POLISI Y'U RWANDA

Urubyiruko rw’abanyeshuri rukomeje kugaragaza ubushake bwo gufatanya kurwanya ibyaha, rushyiraho amahuriro agamije kubikumira.

Ni muri urwo rwego, ku itariki 13 z’uku Kwezi,  abiga mu Rwunge rw’Amashuri rwa Busogo ya kabiri, ruherereye mu murenge wa Busogo, ho mu karere ka Musanze, bashyizeho Ihuriro ryo kurwanya Ihohoterwa rishingiye ku gitsina n’iryo kurwanya ikoreshwa, itundwa n’icuruzwa ry’ibiyobyabwenge.

Bayashyizeho nyuma y’ibiganiro bagiranye n’ushinzwe imikoranire ya Polisi y’u Rwanda n’abaturage ndetse n’izindi nzego muri aka karere, Inspector of Police (IP) Viateur Ntiyamira.

Uyobora Ihuriro ryo kurwanya Ibiyobyabwenge, Simbi Yandokoye Josué yagize ati,"Iri huriro ni uburyo buduhuza tukungurana ibitekerezo ku ruhare rwacu nk’urubyiruko mu kurwanya ibiyobyabwenge by’amoko yose ."

Yakomeje agira ati,"Turi amaboko y’igihugu. Tugomba gukoresha imbaraga zacu mu gukumira no kurwanya ikintu cyose gishobora kubangamira  iterambere  n’umutekano byacyo n’abagituye ."

Umuhuzabikorwa w’Ihuriro ryo kurwanya ihohoterwa rishingiye ku gitsina, Ngendahayo Alexis yasabye bagenzi be gukangurira abo mu miryango yabo, ndetse  n’abaturanyi babo kwirinda iryo hohoterwa.

Yagize ati,"Mujye mubabwira ko umuhungu n’umukobwa bafite uburenganzira bumwe. Ko nta we ugomba kugira icyo avutswa kubera ko ari uyu cyangwa uriya."

IP Ntiyamira yabwiye  abo banyeshuri ati," Kwishora mu biyobyabwenge  ubwabyo ni icyaha. Bigira kandi ingaruka mbi ku myigire n’ubuzima muri rusange. Mubyirinde, kandi mukangurire urundi rubyiruko, ndetse n’abandi muri rusange kutabyishoramo, mubabwira ingaruka zabyo."

Yagize kandi ati:"Nta bwenge umunywi w’ibiyobyabwenge agira. Ni yo mpamvu akora ibyaha birimo ubujura, gukubita no gukomeretsa, gufata ku ngufu n’ihohoterwa rishingiye ku gitsina."

Yabasabye kujya batanga ku gihe amakuru ajyanye n’ihohoterwa rishingiye ku gitsina kuri Sitasiyo ya Polisi ibegereye, cyangwa bagahamagara nimero za telefone zitishyurwa 3512 na 3029 (Isange One Stop Center).

IP Ntiyamira yahaye abo banyeshuri  Imfashanyigisho ibayobora mu bukangurambaga bwo kurwanya Ihohoterwa rishingiye ku gitsina n’ikoreshwa ry’ibiyobyabwenge.

Umuyobozi w’iri Shuri, Soeur Uwamariya Drocella yashimye Polisi y’u Rwanda ku bumenyi yahaye abo banyeshuri; hanyuma abasaba gukurikiza inama bagiriwe.

Mu karere ka Musanze kugeza ubu hari amahuriro yo kurwanya ibyaha 143. Muri yo

58 ari mu mashuri 29 (Abiri muri buri Shuri), naho 85 asigaye yashyizweho n’ibyiciro bitandukanye by’abaturage barimo Urubyiruko rw’Abakorerabushake mu kubungabunga umutekano  n’abatwara abagenzi kuri moto n’amagare.