POLISI Y'U RWANDA

Urubyiruko rw’abakorerabushake rwasabwe kurushako kugaragaza uruhare rwabo mu iterambere ry’imibereho myiza y’abaturage, kunoza imyitwarire myiza no gukumira ibyaha binyuze mu bufatanye bwa hafi n’inzego z’ibanze ndetse n’iz’umutekano bakorana umunsi ku munsi.

Ibi babisabwe kuri uyu wa Mbere tariki ya 24 Kanama, mu mahugurwa y’umunsi umwe yateguwe na Minisiteri y’Ubutegetsi bw’Igihugu ku bufatanye na Polisi y’u Rwanda, yabereye mu Karere ka Kicukiro mu Mujyi wa Kigali. Aya mahugurwa yanatangije ubukangurambaga bw’ukwezi kumwe buzabera mu gihugu hose, guhera kuri iyi tariki, mu turere twose tw’igihugu.

Aya mahugurwa yahuje abayobozi b’inzego z’ibanze, Polisi, abagize komite y’urubyiruko rw’abakorerabushake ku rwego rw’gihugu ndetse n’abahagarariye urubyiruko rw’abakorerabushake mu karere ka Kicukiro, baganiriye ku buryo bwo gukomeza ubufatanye hagati yabo, inzego z’ibanze n’iz’umutekano mu gukemura ibibazo by’imibereho n’umutekano bigira ingaruka ku baturage.

Umuyobozi Mukuru ushinzwe ubukangurambaga mu baturage no guhuza ibikorwa by’Urubyiruko rw’Abakorerabushake muri Minisiteri y’Ubutegetsi bw’Igihugu (MINALOC), Richard Kubana, yashimiye urubyiruko rw’abakorerabushake uruhare bagira mu iterambere ry’abaturage no mu bikorwa bya gahunda z’igihugu.

Yabasabye gukoresha uburyo basanzwe bakoranamo n’abaturage mu gufasha imiryango, gukangurira urubyiruko kugira imyitwarire iboneye no kugira uruhare mu gukemura ibibazo by’imibereho bibangamiye abaturage.

Yagize ati: “Muri aba agaciro ku gihugu, igihugu kizirikana kandi kikanashimira ibyo mukora. Mukoreshe umwanya mufite n’icyizere mufitiwe mu baturage muyobore urubyiruko kurangwa n’imyitwarire myiza, gufasha imiryango no kugira uruhare mu gukemura ibibazo bibangamiye abaturage.”

Kubana yasabye urubyiruko rw’abakorerabushake kugira uruhare mu gukumira no gukemura bimwe mu bibazo bigaragara birimo; gusenyuka kw’imiryango, imikoreshereze mibi y’imbuga nkoranyambaga, ubusambanyi, ubunebwe no kwishingikiriza ku bandi mu rubyiruko.

Ku bijyanye n’umutekano w’abaturage no gukumira ibyaha, Chief Superintendent of Police (CSP) Jackline Urujeni, Umuyobozi w'Ibiro bishinzwe guhuza ibikorwa by'urubyiruko rw'abakorerabushake muri Polisi y'u Rwanda, yavuze ko urubyiruko rw’abakorerabushake ari abafatanyabikorwa b’ingenzi mu gukumira ibyaha.

Yagize ati: “Urubyiruko ni bamwe mu b’ibanze b’ingenzi mu guteza imbere umutekano n’iterambere by’abaturage. Rufite imbaraga, rufitanye imikoranire ya hafi n’abaturage, ruzi ibibazo bibugarije kandi rushobora gukoresha ikoranabuhanga mu itumanaho.”

Yavuze ko uruhare rw’urubyiruko rw’abakorerabushake rushobora gufasha mu gutahura hakiri kare ibibazo bibangamiye umutekano, gusangira amakuru, gukangurira abaturage no kubashishikariza ibikorwa byo gukumira ibyaha.

CSP Urujeni yasabye kandi abakorerabushake gukangurira urubyiruko kwirinda kunywa inzoga n’ibiyobyabwenge, ahubwo bagakora ibikorwa bibateza imbere.

Yagize ati: “Iterambere ry’igihugu risaba kugira urubyiruko rufite imbaraga kandi rutanga umusaruro. Imbaraga zubaka igihugu rero ntizishobora kucyubaka mu gihe zashowe mu kunywa no gukoresha ibiyobyabwenge n’ibinyobwa bitemewe.”

Ubu bukangurambaga bw’ukwezi kumwe buzibanda ku gukomeza ubufatanye hagati y’urubyiruko rw’abakorerabushake, inzego z’ibanze n’inzego z’umutekano, hagamijwe gukumira ibyaha, guteza imbere imyitwarire myiza mu baturage no kugira uruhare mu iterambere ry’imiryango n’abaturage muri rusange.