Kinyarwanda
English
Ihuriro nyarwanda ry’urubyiruko rw’abakorerabushake mu gukumira no kurwanya ibyaha (Rwanda Youth Volunteers in Community Policing- RYVCP) ku wa gatandatu tariki ya 24 Werurwe mu gihugu hose rwazindukiye mu gikorwa cy’umuganda waranzwe no gutunganya inzibutso z’abazize Jenoside yakorewe abatutsi mu 1994, no gusana inzu zangiritse za bamwe mu bayirokotse.
Uyu muganda ukaba wari uri mu rwego rwo kwitegura Kwibuka ku nshuro ya 24 Jenoside yakorewe Abatutsi biteganyijwe kuzatangira ku itariki ya 7 Mata uyu mwaka.
Ubusanzwe iri huriro ry’urubyiruko rw’abakorerabushake mu gukumira no kurwanya ibyaha risanzwe ryarihaye gahunda yo guhurira mu gikorwa cy’umuganda buri wa gatandatu wa gatatu w’ukwezi, bagakora ibikorwa biteza imbere igihugu no gufasha abatishoboye, hagamijwe kugeza igihugu ku iterambere rirambye n’amahoro n’umutekano.
Mu karere ka Ngororero, gusukura inzibutso byabereye mu mirenge yose igize aka karere, ariko ku rwego rw’akarere urubyiruko rufatanyije n’abandi baturage ndetse n’abayobozi b’akarere bari barangajwe imbere n’Umuyobozi wako Ndayambaje Godefroid, basukuye urwibutso ruherereye mu murenge wa Gatumba.
Meya Ndayambaje mu ijambo rye, yashimye ubwitange bw’uru rubyiruko anasaba abandi kugera ikirenge mu cyabo, nabo bakagira umutima wo gukunda igihugu.
Yagereranyije ibikorwa biteza imbere igihugu by’uru rubyiruko rw’abakorerabushake mu gukumira no kurwanya ibyaha n’iby’urubyiruko rwagize uruhare muri Jenoside yakorewe abatutsi mu 1994, avuga ko ntaho bihuriye kuko urw’icyo gihe rwabaye ibigwari, aho kubaka igihugu ahubwo bakagisenya.
Mu karere ka Ngoma, mu mirenge ya Kibungo, Kazo, Mutenderi, Zaza na Rukumberi hatunganyijwe inzibutso, urubyiruko runubakira ubwiherero imiryango 5 y’abacitse ku icumu batishoboye, runabaha umubyizi no kubasukurira insina.
Igikorwa nk’iki kandi, cyanabereye mu karere ka Rusizi mu murenge wa Bugarama akagari ka Ryankana, aho urubyiruko rwabumbye amatafari arenga 500 rukanasakara ubwiherero bw’umuryngo w’uwitwa Sebareme Boniface.
Mu karere ka Bugesera, uru rubyiruko rwifatanyije n’umunyamabanga nshingwabikorwa w’inama nkuru y’igihugu Mwesige Robert ari kumwe n’umuyobozi wa Polisi mu karere ka Bugesera Superintend of Police (SP) Alex Ntaburane, basukuye ndetse banatera ubusitani imbere y’urwibutso ruri mu murenge wa Gashora akagari ka Biryogo ahashyinguye inzirakarengane zazize Jenoside yakorewe Abatutsi zirenga 5140.
Mu ijambo Mwesigye yavuze, yasabye urubyiruko rwari aho guhora baharanira icyabateza imbere bo ubwabo n’icyateza imbere igihugu, bakirinda icyababuza kugira uruhare mu iterambere ry’igihugu.
Uyu muganda kandi wanabereye mu mirenge yose uko ari 13 igize akarere ka Karongi, ku rwego rw’akarere ukaba warabereye ku rwibutso rwa Gatwaro ruherereye mu murenge wa Bwishyura, aho rwari rwanifatanyije na Senateri Mukankusi Perrine.
Senateri Mukankusi yashimye ibikorwa bya kimuntu by’uru rubyiruko, anasaba abaturage bose kugera ikirenge mu cy’uru rubyiruko, bagahora baharanira gufasha no guteza imbere imiryango itishoboye.
Kugeza ubu Ihuriro nyarwanda ry’urubyiruko rw’abakorerabushake mu gukumira no kurwanya ibyaha (Rwanda Youth Volunteers in Community Policing- RYVCP) rifite abanyamuryango barenga ibihumbi 250, rikaba ryaratangijwe mu mwaka wa 2013 rifite abanyamuryango batarenga 300, ahanini abanyamuryango baryo bakaba bagizwe n’abanyeshuri biga muri za Kaminuza n’amashuri makuru, rikaba rifite ubuyobozi kuva ku rwego rw’umudugudu kugeza ku rwego rw’Intara.
