Kinyarwanda
English
Abagize urubyiruko rw’abakorerabushake mu kurwanya ibyaha bafatanyije na komite z’urubyiruko mu karere ka Bugesera batangije ubukangurambaga bw’”ubukorerabushake” muri aka karere mu rwego rwo guha imbaraga gahunda yo gukumira ibyaha.
Ku italiki ya 21 Nyakanga, abahuzabikorwa b’uru rubyiruko mu mirenge ya Nyarugenge, Shyara na Ruhuha bakoze inama n’abagize komite z’urubyiruko muri iyi mirenge, bavugana uko bakorera hamwe ngo bagire umubare munini nka kimwe mu byabafasha kugera ku ntego zo gukumira no kurwanya ibyaha.
Ushinzwe guhuza ibikorwa bya Polisi n’abaturage mu karere ka Bugesera , Assistant Inspector of Police (AIP) Cyprie Uwitonze wanageze muri izi nama zose, yabagiriye inama yo guhuza ibitekerezo kandi bakaba ijwi ry’impinduka.
Yagize ati:”uruhare rwanyu nk’urubyiruko rugamije ikintu kimwe, ni ukugira urubyiruko rufite intumbero yo guhindura igihugu, niyo mpamvu mugomba gukorera hamwe nk’ijwi rimwe kandi mukubaka umuco w’ubukorerabushake mu rundi rubyiruko.”
Izi nama kandi zitabiriwe na Felix Ramburuza, ushinzwe urubyiruko mu karere n’umuhuzabikorwa w’urubyiruko rw’abakorerabushake muri bugesera, Antoine Mutware.
Inama nk’izi kandi zizakomeza kuba mu mirenge yose igize akarere ka Bugesera.
Mutware yagize ati:”Buri murenge mu gihugu ufite intego yo kugira urubyiruko 200 rukorera ubushake, uyu ni umwe mu miyoboro izadufasha gukorera hamwe ,gushyiraho ubukorerabushake mu babyiruka no kugira abanyamuryango benshi.”
Mu karere ka Bugesera bageze ku rubyiruko 957 rw’abakorerabushake ku bagera ku 3000 bifuzwa.
