POLISI Y'U RWANDA

Mu rwego rw’ibiganiro byateguwe na Polisi y’u Rwanda ifatanyije n’inzego z’ibanze muri uku kwezi kwahariwe urubyiruko mu Rwanda, kuri uyu wa kane tariki ya 22 Gicurasi, urubyiruko rw’ibyiciro bitandukanye rwo mu murenge wa Rwezamenyo akarere ka Nyarugenge, rwahawe ibiganiro byo kwirinda ibiyobyabwenge n’ibisindisha, ndetse no gukomeza kwibungabungira umutekano.

Ibi biganiro bikaba byarabereye mu mudugudu w’Umucyo akagari ka Rwzamenyo ya 2, Umurenge wa Rwzamenyo akarere ka Nyarugenge.

Ibi biganiro bikaba byaritabiriwe n’urubyiruko rugera kuri 210 rwaturutse mu nama y’igihugu y’urubyiruko mu midugudu, utugari n’umurenge wa Rwezamenyo, abahagarariye intore mu midugudu, utugari n’umurenge, abahagarariye amashyirahamwe n’amakoperative akorera mu murenge, abahagarariye abamotari bakorera mu murenge, n’abakuru b’utugari tw’umurenge wa Rwezamenyo.

Umunyamabanga nshingwabikorwa w’umurenge wa Rwezamenyo Semitari Alexis yashishikarize urubyiruko rwa buri kagari kwibumbira mu mashyirahamwe, abakangurira gahunda ya ndi Umunyarwanda, ndetse anabasaba gukoresha ikoranabuhanga kuko u Rwanda ruri kwihuta mu iterambere.

Umupolisi ushinzwe guhuza ibikorwa bya Polisi n’iby’abaturage mu karere ka Nyarugenge, Assistant Inspector of Police (AIP) Alexandre Minani, yaganirije uru rubyiruko  ku kwirinda ibiyobyabwenge no kurwanya ibyaha binyuranye, anarusobanurira amoko y’abyo akunda kuboneka mu Rwanda, anahamagarira rumwe mu rubyiruko rwo muri Rwezamenyo rukoresha ibiyobyabwenge  kwitandukanya nabyo,  kuko uretse no kubakururira ibibazo byo gufungwa, bibangiriza ubuzima kandi bigatuma badindira mu bikorwa by’iterambere.

AIP Minani yasoje asaba uru rubyiruko gukomeza gukorana na Polisi, rutanga amakuru hakiri  kare kugira ngo habeho kurinda no kurwanya ikwirakwizwa ry’ibyo biyobyabwenge mu baturage.

Nyuma y’ibi biganiro, umwe mu rubyiruko Munyakazi Hardi yavuze ko yishimiye ibi biganiro aho yagize ati:” Najyaga n’umva ibiyobyabwenge nkumva ko ari urumogi gusa, ariko nyuma y’ibi biganiro, menye ko hari n’ubundi bwoko bwabyo kandi bukoreshwa hano mu Rwanda, ibi biganiro bimfashije kumva uburemere bw’ikibazo cy’ibiyobyabwenge, nkaba ngiye gushishikariza urubyiruko bagenzi banjye guca ukubiri n’ibiyobyabwenge ndetse n’ibisindisha”.