POLISI Y'U RWANDA

Urubyiruko Nyarwanda rw’abakorera bushake mu kurwanya no gukumira ibyaha (Rwandan Youth Volunteers in Crime Prevention Organization-RYVCPO) rukomeje kwagura ibikorwa byarwo, rukaba ku itariki 29 Kamena uyu mwaka, rwatangije itsinda ryo kurwanya no gukumira ibyaha (Anti-Crimes Club) mu rwunge rw’amashuri rwa Kacyiru, iryo tsinda rikaba rigizwe n’abanyeshuri barwigamo.

Iki gikorwa cyabereye muri iri shuri mu kagari ka Kamutwa,mu murenge wa Kacyiru,mu karere ka Gasabo, kitabiriwe n’Umuvugizi wa Polisi y’u Rwanda mu mujyi wa Kigali, Superintendent of Police (SP) Modeste Mbabazi, ndetse n’ushinzwe guhuza ibikorwa bya Polisi y’u Rwanda n’abaturage, hagamijwe kurwanya no gukumira ibyaha mu karere ka Gasabo, Inspector of Police (IP), Joseph Nzabonimpa.

SP Mbabazi yabanje gusobanurira abo banyeshuri bageraga kuri 900 icyo icyaha aricyo, uko bakirinda, n’uruhare rwabo mu kukirwanya no kugikumira.

Aha akaba yarababwiye ko icyaha ari igikorwa icyo aricyo cyose kinyuranije n’amategeko, aha akaba yakomeje ababwira ko ibyaha byose hari amategeko abihana.

Kunywa, gutunda, no gucuruza ibiyobyabwenge birimo kanyanga n’urumogi, biri mu byaha SP Mbabazi yagarutseho kenshi, akaba yarabasabye kubyirinda no kugira uruhare mu kubirwanya , byaba ku ishuri n’iwabo mu rugo.

Yagize ati:"Ibiyobya bwenge nk’uko bivugitse.Uretse kuba bigira ingaruka mbi ku buzima bw’uwabinyoye, bituma akora cyangwa agira uruhare mu gukora ibindi byaha birimo ubujura, urugomo, gufata ku ngufu, no gusambanya abana".

Yabasobanuriye  ko biri mu bishobora kubashora mu ngeso mbi nk’ubusambanyi,  bukurikirwa rimwe na rimwe no gutwara inda zidateganyijwe, kuva mu ishuri, kwirukanwa mu muryango kuri bamwe, ipfunwe, kuba ababyeyi imburagihe, no kwandura zimwe mu ndwara zandurira mu mibonano mpuzabitsina nka Sida n’izindi.

SP Mbabazi yakomeje ababwira ati:"Ubinywa, uretse kumuteza ubukene we ku giti cye ndetse n’umuryango we muri rusange, bituma ateza umutekano muke, bityo agahungabanya ituze rya rubanda muri rusange, akaba ariyo mpamvu buri wese akwiye kutabinywa, kutabitunda no kutabicuruza, kandi agatanga amakuru ku gihe ku babikora."

Yakomeje ababwira ati:" Ntushobora gutsinda mu ishuri cyangwa ngo ube umwenegihugu mwiza unywa ibiyobyabwenge. Imbere hanyu ni heza kandi imiryango yanyu ndetse n’igihugu muri rusange bibatezeho byinshi kandi byiza.Mukwiye  rero kwirinda no kurwanya ikintu cyose gishobora kurogoya ahazaza hanyu heza."

SP Mbabazi yababwiye kandi ko guharanira uburenganzira bwabo batanga amakuru ku gihe ku ihohoterwa rishobora kubakorerwa ririmo gukoreshwa imirimo ivunanye, ihohoterwa rishingiye ku gitsina, ibyo bakabikora basobanurira ababyeyi babo n’abarezi babo muri rusange ibijyanye n’uburenganzira bw’umwana, ariko noneho mu gihe hagize ububangamira bakabibwira Polisi n’izindi nzego bireba kugira ngo afatwe ahanwe n’ubutabera.

Yabasabye kwiyumva no gushyigikira iryo itsinda ryabo ryo kurwanya no gukumira ibyaha.

Umuyobozi wa RYVCPO, Jean Bosco Mutangana,yavuze ko iki gikorwa kigamije kurushaho gukangurira urubyiruko kwirinda ibyaha no kugira uruhare mu gusigasira umutekano.

Yagize ati:" Hari urubyiruko rwagize uruhare muri Jenoside yakorewe Abatutsi mu 1994. Igishimishije n’uko hari urundi rubyiruko rw’abanyarwanda rwayihagaritse ndetse rukanabohoza igihugu.Ubwo bwitange bwarwo bugaragaza ubutwari no gukunda igihugu. Dukwiye gutera ikirenge mu cyarwo twirinda icyaha kandi tugira uruhare mu gusigasira ibyo igihugu kimaze kugeraho".

Mutangana yabwiye abo banyeshuri ko umutekano ari ishingiro ry’iterambere rirambye, bityo abasaba kugira uruhare mu kuwusigasira birinda ikintu cyose kinyuranyije n’amategeko, kandi abasaba kujya batanga amakuru ku gihe yatuma gikumirwa ndetse yanatuma hafatwa abagikoze cyangwa abategura kugikora.

Yavuze ko RYVCPO imaze gushyira bene aya matsinda hafi muri za Kaminuza n’Amashuri makuru byo mu Rwanda ndetse no mu mashuri y’isumbuye, kandi ko ayo matsinda agira uruhare rugaragara mu kurwanya ibyaha, cyane cyane ibiyobyabwenge.

Umuyobozi w’iri shuri, Rukundo Vincent, yashimiye RYVCPO kuba yatanjije iri tsinda mu ishuri abereye umuyobozi, akaba yaravuze ko rizunganira ubuyobozi bwaryo mu kurushaho kurwanya ibyaha bishobora gukorerwa ku ishuri ndetse no hanze yaryo.

Yagize ati:"Ahari abantu benshi birashoboka ko hagira ukora ibyaha birimo kunywa, gutunda no gucuruza ibiyoyabwenge.Iri tsinda rizadufasha kurushaho kubirwanya no kubikumira."

Yashimiye Polisi y’u Rwanda kubera inama yagiriye abo banyeshuri avuga ko zizabafasha kwirinda ikintu gishobora kurogoya imyigire yabo kandi gishobora kwica ahazaza habo heza n’ah’igihugu muri rusange.

Umuyobozi w’iri tsinda,Ndiyunze Ignace, yijeje Polisi y’u Rwanda na RYVCPO ko azafatanya na Komite Nyobozi yaryo igizwe n’abanyeshuri barindwi ndetse n’abanyeshuri muri rusange kurwanya ibyaha muri rusange haba mu ishuri ryabo ndetse n’iwabo.

Kugeza ubu hari amatsinda yo kurwanya no gukumira ibyaha mu gihugu hose agera kuri 810, kandi abayagize bose bamaze guhugurwa ku bijyanye n’ibyo bashinzwe n’uko barushaho kubikora neza.

 Polisi y’u Rwanda mu kwezi kwa Gicurasi uyu mwaka, yasinyanye amasezerano y’ubufatanye mu kurwanya no gukumira ibyaha  n’Umuryango Nyarwanda w’Urubyiruko rw’abakorerabushake.

Polisi kandi kugeza ubu imaze guhugura bamwe mu bagize uyu muryango, mu bijyanye no kubongerera ubumenyi mu gukumira ibyaha.

Uretse ibikorwa byo kurwanya no gukumira ibyaha, uru rubyiruko rukora n’ibindi bikorwa bijyanye n’iterambere ry’abanyarwanda, aha bakaba bubakira amacumbi abatishoboye, kubashakira ubwishingizi mu kwivuza (mituelle) ndetse no kworoza amatungo magufi abakene.