Kinyarwanda
English
Ku munsi wa gatatu w’uruzinduko rw’akazi agirira muri Sudani y'epfo, kuri uyu wa 30 Nyakanga, Umuyobozi mukuru wa Polisi y’u Rwanda IGP Dan Munyuza yakiriwe na Mugenzi we wa Sudani y’Epfo General Majak Acek. Bagirana ibiganiro byibanze ku kurwanya no gukumira ibyaha, gusangira ubunarararibonye, kubaka ubushobozi no guhanahana amakuru.
Ibi biganiro byagarutsweho n’aba bayobozi bombi byari mu murongo w’ubufatanye usanzwe uranga Polisi y’u Rwanda n’iya Sudani y’Epfo. Ni mu rwego rwo gushyira mu bikorwa ndetse no gushyigikira amasezerano y’ubufatanye yasinywe mu mwaka wa 2011.
Bamwe mu bapolisi ba Sudani y’Epfo bahuguwe ndetse bigishwa na Polisi y’u Rwanda. Umubare muni ni uw'abapolisi bakuru barangije amasomo ahanitse mu by’ubuyobozi agenerwa aba-Ofisiye bakuru muri Polisi, aho bamwe bahavana impamyabumenyi ihanitse y’icyiciro cya gatatu cya kaminuza, mu masomo ajyanye no gukemura impaka. Ni amasomo atangirwa mu Ishuri rikuru rya Polisi y'u Rwanda riherereye mu karere ka Musanze intara y'Amajyaruguru.
Umuyobozi wa Polisi y’u Rwanda IGP Dan Munyuza kandi yitabiriye n’umuhango wo kwizihiza umunsi w'intwari wabereye mu murwa mukuru - Juba. Uyu muhango wayobowe na Perezida wa Repubulika ya Sudan y’Epfo witabiriwe n'abayobozi bakuru muri Sudani y’Epfo ndetse n’imiryango mpuzamahanga. Ni umuhango waranzwe n’akarasisi ka gisirikare no kwambika imidari.
