POLISI Y'U RWANDA

Ikipe yoherejwe n'umuryango w'abibumbye yatangiye igenzura rizakorwa mu minsi itanu muri Polisi y'Igihugu mu kureba aho imyiteguro yo kohereza umutwe w'abapolisi wihariye (Protection Support Unit-PSU) mu butumwa bw'amahoro muri Centrafrique igeze.

Ikipe y'umuryango w'abibumbye yavuye mu ishami rishinzwe kugarura amahoro ku isi ryatangiye igenzura tariki ya 12 Mata; bafite inshingano zo kureba ko ibikoresho uwo mutwe uzatwara muri Centrafrique byujuje ibisabwa (UN Multi-dimensional Integrated Stabilization Mission in Central African Republic (MINUSCA).

Polisi y'igihugu isanzwe ifite umutwe w'abapolisi ushinzwe kurinda umutekano muri icyo gihugu, uyu mutwe udasanzwe ugiye koherezwa uzuzuza uwo mutwe uhasanzwe kuko uzaba urimo abapolisi bafite amahugurwa yihariye kandi ufite ibikoresho byabugenewe mu kurinda abayobozi ukazanagira uruhare mu bindi bikorwa byihariye bijyanye n'ibikorwa bya polisi.

ACP Jimmy Hodari, Komiseri ukuriye ishami rishinzwe abapolisi bajyanwa mu butumwa bw'amahoro, yagaragaje ko ikipe yoherejwe gukora igenzura ifite ubutumwa bwo kureba ko ibikoresho bizajyanwa byujuje ibyangombwa kandi ko n'abapolisi bagiye koherezwa mu butumwa bafite ubushobozi bwa ngombwa.

ACP Jimmy Hodari yagize ati:"ku bijyanye n'ubushobozi bw'uyu mutwe wihariye ugiye koherezwa, binajyanye n'aho bagiye koherezwa, bazaba bafite inshingano zo kurinda abayobozi n'abandi banyacyubahiro, bazaba barimo ikipe ikorera hamwe, izenguruka ndetse n'itabara ku buryo bwihuse ahantu hose hari ikibazo mu rwego rwo kurinda abayobozi bakuru b'umuryango w'abibumbye muri Centrafrique banubahiriza umutekano".

 Yakomeje agira ati: "Polisi y'Igihugu yihaye gahunda yo gukomeza kugira uruhare mu gukumira amakimbirane no kubungabunga amahoro n'umudendezo muri rusange no gukomeza kubaka umubano n'ibindi bihugu binyujijwe mu bikorwa byo kubungabunga umutekano".

Polisi y'Igihugu ifite abapolisi bari mu butumwa bw'amahoro barenga 600 mu bihugu umunani, 21% ni igitsina gore bakaba bari muri Haiti, Mali, Darfur, Abyei, South Sudan, Ivory Coast, Centrafrique na Liberia.