POLISI Y'U RWANDA

Ku wa Gatandatu tariki ya 29 Ugushyingo, abanyeshuri biga mu Ishuri rikuru rya Polisi (NPC) riherereye mu Karere ka Musanze biga amasomo ajyanye n'ubuyobozi agenerwa abapolisi bo ku rwego rwa ba Ofisiye bakuru (Police Senior Command and Staff Course) n’abanyeshuri biga mu cyiciro cya Kabiri cya Kaminuza bitabiriye igikorwa cy’umuganda rusange ngarukakwezi wahariwe gutera ibiti hagamijwe kubungabunga ibidukikije.

Uyu muganda wasozaga ukwezi witabiriwe n'abagera kuri 662 barimo ba Ofisiye Bakuru 38 bo mu bihugu icyenda (9) bitandukanye byo muri Afurika biga muri iri shuri ari byo; Gambia, Malawi, Kenya, Namibia, Eswatini, Repubulika ya Santrafurika, Somalia, Uganda, Sudani y'Epfo ndetse n'abo mu Rwanda, baturutse mu nzego z’igihugu z’umutekano ari zo; Polisi y'u Rwanda, Urwego rw’igihugu rushinzwe igorora (RCS), Urwego rw’igihugu rushinzwe ubugenzacyaha (RIB) n’urwego rw’igihugu rushinzwe iperereza n'umutekano (NISS) kongeraho n'abiga mu cyiciro cya kabiri cya Kaminuza bagera kuri 624.

Ni igikorwa cyateguwe muri gahunda ya Leta yo kurwanya isuri no kubungabunga ibidukikije ku nsanganyamatsiko igira iti: “Igiti Cyanjye Umurage Wanjye” kirimo gukorwa mu gihe cy'amezi atatu mu gihugu hose, kuva ku itariki ya 12 Nzeri, ari nabwo cyatangijwe kikazasozwa ku mugaragaro ku itariki ya 31 Ukuboza.

Nyuma y’umuganda Umuhuzabikorwa w’amasomo mu Ishuri rikuru rya Polisi wari ubayoboye mu rugendoshuri, Assistant Commissioner of Police (ACP) Modeste Bisangwa yashimiye abanyeshuri bitabiriye iki gikorwa cy’umuganda avuga ko buri munyeshuri yateye igiti ndetse kikanashyirwaho ibendera mu buryo bwo gusigasira umubano U Rwanda rufitanye n’ibyo bihugu.

Yagize ati: “Ibi biti mwateye bizahora byibutsa igihe mwamaze muri iri shuri. Buri wese agomba kujya yita ku giti yateye kugeza gikuze bityo n'iyo mwe mwasoza amasomo mugasubira mu bihugu byanyu, abandi bazaza kwiga hano bazabona ko hari ibyo mwakoze kandi byiza’’.

ACP Bisangwa yakomeje avuga ko gukora umuganda hano mu Rwanda byabaye umuco kandi ashimira ubuyobozi bw’Ikigo bwahisemo ko abanyeshuri biga muri iri shuri bakora Umuganda wo gutera ibiti, bigashyirwaho amabendera n’Amazina y’umunyeshuri wagiteye bituma anacyitaho kuzageza gikuze.

Yagize ati: ‘‘Impamvu twabihisemo gutya ni uko akamaro k’igiti kazwi neza nko kuzana umwuka mwiza tugahumeka neza, tukabaho mu Rwanda rwiza rusa neza kandi rufite isuku’’.

ACP Bisangwa yasoje asaba abanyeshuri bitabiriye umuganda gukomeza kugira uruhare mu kwita kuri ibi biti bateye no gufatanya n’ubuyobozi bw’ikigo kubirinda kandi bakazafatanya kubivomera kugira ngo bizakure neza bitange umusaruro igihe bizaba bikuze.

Deputy Commissioner of Police (DCP) Chairmane Roseline Uhindua umwe mu banyeshuri ukomoka muri Namibia, yavuze ko umuganda bakoze ufite igisobanuro kuri we ndetse no ku banyeshuri bigana.

Yagize ati: ‘‘Iki gikorwa twakoze kizahora kitwibutsa iri shuri,  ndetse n’abanyeshuri bazaturuka mu bihugu duturukamo bazaza kwiga hano twe twarahavuye bazabona ko hari igikorwa cy’ingenzi twakoze igihe twigaga hano’’.

DCP Uhindua yakomeje avuga ko u Rwanda ari igihugu cyiza kandi gifite isuku, yongeraho ko ibiti bateye bazabyitaho babivomera kugeza bikuze ku gisobanuro cy'ubwitange no kwimakaza ubumwe, byiyongera ku masomo biga muri iri shuri.

Chief Superintendent of Police (CSP) Omar Jali  Bah ukomoka muri Gambia yashimangiye ko gutera ibiti ari nko kubaka inzu, kubera ko igihe cy’izuba bazajya babyugamamo izuba.

Yakomeje avuga ko u Rwanda rufite isuku kandi ko arwigiraho byinshi birimo n’igikorwa cy'umuganda bakoze uyu munsi.

Yasoje ashimira bagenzi be bafatanyije gukora Umuganda wo gutera ibiti, ko ari isomo rikomeye azajyana mu gihugu akomokamo, bikaba byaba ari ishema kuri we nabo bagiye bafata igihe bagakora Umuganda mu gihugu akomokamo.