POLISI Y'U RWANDA

Ubukangurambaga bwa Polisi y’u Rwanda bwo kurwanya ikoreshwa ry’ibiyobyabwenge n’inzoga zitemewe gucuruzwa mu Rwanda mu karere ka Burera by’umwihariko no mu   Rwanda muri rusange, buri gutanga umusaruro ku buryo ku bufatanye n’abaturage hari ibigenda bifatwa.

Kuwa gatanu tariki ya 26 Gicurasi, muri aka karere ka Burera hakaba harabereye ibikorwa byo kwangiza ibiyobyabwenge bitandukanye byafashwe na Polisi y’u Rwanda muri aka karere mu mezi atatu ashize. Ibikorwa byo kubyangiza byabereye mu mirenge ya Cyanika, Butaro, Rusarabuye na Nemba, aha hose abaturage bakaba baranagejejweho ubutumwa bujyanye no kwirinda ibyo biyobyabwenge.

Ibiyobyabwenge byangijwe bifite agaciro ka miliyoni zirenga 26, bikaba ari: litiro 2246 za Kanyanga, udupfunyika 217 tw’urumogi, amaduzeni 48 ya Zebra Waragi, amaduzeni 346 ya Chief Waragi, amaduzeni1325 ya Chase Vodka, aamduzeni 1148 ya African Gins, aamduzeni 16 ya Kuki, amaduzeni 293 ya Coffee Spirit, amaduzeni 154 ya Kitoko, amaduzeni 265 ya Hot Waragi, n’amaduzeni 150 ya Leaving Waragi.

Mbere yo kwangiza ibi biyobyabwenge n’izi nzoga, umuyobozi wa Polisi mu karere ka Burera Superintendent of Police (SP) Alex  Fata wari uri mu murege wa Cyanika, yasabye abaturage kwirinda kunywa izi nzoga ndetse n’ibindi biyobyabwenge kuko bibangiriza ubuzima kandi bikanabadindiza mu iiterambere.

Yarababwiye ati:” Izi nzoga ndetse n’ibindi biyobyabwenge bihindura imitekerereze y’ubinywa, ku buryo imigambi myiza yari afite atayigeraho. Tukaba tubagira inama zo kwitandukanya n’izi nzoga n’ibindi biyobyabwenge kuko bibicira ejo hanyu heza.”

SP Fata yabwiye abaturage bari bateraniye aho ububi bw’ibiyobyabwenge, inzoga zitemewe n’inzoga z’inkorano, ababwira ko byangiza ubuzima  bw’umuntu ubinywa, kuko uwabinyoye bimubamo igihe kirekire ndetse akanasaza imburagihe kubera ububi bwabyo, kandi agahora abirarikiye ku buryo amafaranga ye yose ariho ashirira, bityo ugasanga nta kamaro yigiriye we ubwe ku giti cye ndetse n’igihugu muri rusange.

Yanashimiye abaturage bagize uruhare mu ifatwa ry’izi nzoga kuko izi zafashwe zose  kubera amakuru bahawe n’abaturage, anabasaba ko ubu bufatanye bwakomeza.

Ushinzwe imiyoborere myiza mu karere ka Burera Ayinkamiye Pelagie wari witabiriye iki gikorwa, yasabye abaturage kwirinda no gukumira ibyaha, bakanatahura ababikora n’abo bafatanya muri ubwo bugizi bwa nabi.

Akaba yaragize ati:”Umutekano ni ishingiro ry’amajyambere. Birakenewe rero ko abaturage bawugiramo uruhare, barushaho kurwanya ikintu cyose cyawuhungabanya ndetse n’iterambere ryabo”.

Yabashishikarije kwitabira gahunda za Leta zirimo gahunda ya gir’inka, kwitabira gutanga ubwisungane mu kwivuza, umuganda ndetse no kurangwa n’isuku yaba iyo ku myambaro ndetse no ku mubiri.