POLISI Y'U RWANDA

Minisitiri w’umutekano w’imbere mu gihugu, Dr. Vincent Biruta kuri uyu uwa Gatanu, tariki ya 31 Mutarama 2025, yitabiriye inteko rusange y’umuryango w’ubufatanye uhuza abayobozi bakuru ba Polisi muri Afurika y’Iburasirazuba (EAPCCO), ahabwa kuyobora inama y’abaminisitiri muri uyu muryango, asimbuye mugenzi we wo mu gihugu cy’u Burundi mu gihe cy’umwaka umwe.

Umuhango wo guhererekanya ububasha wabereye mu nama ya 24 y’abaminisitiri bagize umuryango wa EAPCCO yabereye muri Kigali Convention Center ku Kimihurura, ahabwa inshingano zo kuyobora ibihugu 14 bigize uyu muryango.

Mu ijambo yagejeje ku bitabiriye umuhango, Dr. Biruta yashimiye uwamubanjirije uruhare yagize mu guteza imbere icyerekezo n'indangagaciro by’umuryango wa EAPCCO.

Yagize ati: "Nk’ubuyobozi bw’umuryango mu bihe biri imbere, inshingano zo muri ibi bihe zisaba gukomeza ubufatanye, kuko ntitwagera ku ntego dusangiye imbaraga zacu zitifashishijwe mu kuzana impinduka zikomeye mu karere."

Yongeyeho ko nk'ubuyobozi mu rwego rwo kubumbatira umutekano, hagomba kubahirizwa ihame ryo  kurengera ibidukikije kugira ngo ibibazo bihagaragara bibashe gukemurwa.

Ati: "Izi ni inshingano zisaba imbaraga, kwiyemeza, gufatanya no kuburizamo ibihungabanya umutekano rusange. Gushimangira ubufatanye bw'akarere, no gusangira amakuru, ni bwo buryo bwiza bwo guhangana n'ibibazo by’umutekano duhura nabyo. “

Yakomeje ati: “Imbaraga zacu zikomezwa n’ubumwe no gufatanya, kandi tugomba gukorera hamwe kugira ngo turinde kandi dukorere neza abaturage bacu dushinzwe."

Brig Gen. André Ndayambaje, umunyamabanga uhoraho ushinzwe umutekano rusange w’abaturage muri Minisiteri y’umutekano, iterambere ry’abaturage n’ituze rusange mu Burundi, yashimangiye ko ari ngombwa ko habaho ubufatanye bwa hafi n’isangizamakuru mu rwego rwo kurwanya impinduka mu bihungabanya umutekano muri aka karere, byiganjemo ibyaha byambukiranya imipaka nk'iterabwoba, kwigana amafaranga, ibyaha by’ubukungu, iby’ikoranabuhanga, icuruzwa ry’abantu n’ibindi kugira ngo umutekano urusheho kwitabwaho.

Yasabye ko hategurwa amahugurwa ahuriweho n’ibikorwa bihuza inzego z’umutekano kandi bishimangira ubufatanye hagati yazo n’abaturage mu kurwanya ubuhezanguni.

Inteko rusange ngarukamwaka ya 26 y’umuryango wa EAPCCO yateguwe ku nsanganyamatsiko yo Gushimangira ubufatanye bw’inzego zishinzwe kugenzura iyubahirizamategeko mu kurwanya iterabwoba, ibyaha byambukiranya imipaka n’ibyaha by’inzaduka."