POLISI Y'U RWANDA

Polisi  ikorera mu karere ka Rwamagana yagiranye inama nyunguranabitekerezo n’inzego zose z’ubuyobozi mu murenge wa  Muhazi hagamijwe kurushaho kunoza ubufatanye mu gukumira no kurwanya ibyaha barushaho kwicungira umutekano kunoza imereho myiza y’abaturage.

Ibi biganiro byabaye kuri uyu wa 09 Ugushyingo 2017 biyobowe na Inspector of Police (IP) Marie Goreth Uwimana ushinzwe guhuza ibikorwa bya Polisi n’abaturage hagamijwe gukumira no kurwanya  ibyaha mu karere ka Rwamagana  ari kumwe n’umunyamabanga nshingwabikorwa w’umurenge wa Muhazi, Egide Hanyurwimfura.

IP  Uwimana yashimiye ubufatanye buri hagati ya Polisi n’inzego zitandukanye  mu murenge wa Muhazi hagamijwe kurushaho kugira umutekano usesuye kuko ariwo nkingi y’iterambere ry’umuturage n’igihugu muri rusange.

Yagize ati:”Turishimira ko inzego zitandukanye zikomeje gusenyera umugozi umwe mugukumira no kurwanya ibyaha, abaturage bamaze gusobanukirwa ko umutekanto ari ishingiro ry’imibereho myiza n’iterambere ; ibi ni umusaruro ukomoka ku bufatanye ,bikaba ari  ibintu bikwiye gukomeza.’’

 IP Uwimana yaboneyeho gusaba abayobozi gushishikariza abaturage  kurushaho kwicungira umutekano bakora amarondo hagamijwe gukumira abawuhungabanya.

Aha yagize ati:‘’ Uruhare rw’abaturage  rurakenewe mu kwicungira umutekano turwanya abitwikira ijoro bakiba imyaka  mu mirima, ni ngombwa ko dukaza amarondo mu kuburizamo ibyo byose bihungabanya umutekano .’’

IP Uwimana akomeza avuga ko ntaterambere ryagerwaho urubyiruko rukishora mu biyobyabwenge aho yaboneyeho gusaba abayobozi kurushaho kwegera abaturage no gutangira amakuru kugihe ku bakomeje gucuruza ibiyobyabwenge hirya no hino aho bakorera.

IP Uwimana asoza, yasabye  aba bayobozi kugeza kuri Polisi urutonde rw’ abana batewe inda bakiri bato kungirango ababigizemo uruhare bakurikiranwe n’inzego z’ubutabera.

Yagize ati:‘’ Hari abana b’abakobwa batewe inda bakiri bato bikaba byarabavukije amahirwe yo kwiga , ni uruhare rwa buri wese mu gukumira ibyo bintu ntibizongere ndetse no gutanga amakuru kuwo ari we wese wahungabanyije uburenganzira bw’umwana.’’

Egide Hanyurwimfura,  umunyamabanga nshingwabikorwa w’umurenge wa Muhazi yashimiye Polisi kubiganiro bigamije guhugura abayobozi mu nzego zitandukanye hagamijwe kurushaho kwegera abaturage no kunoza ibyo bakora.

Abayobozi bose kuva mu nzego z’umudugudu kugera ku rwego rw’umurenge nibo bahawe ibiganiro bitanduknye na Polisi y’u Rwanda birimo kurwanya ibiyobyabwenge mu rubyiruko, kwicungira umutekano hakorwa amarondo, ndetse no kurwanya icuruzwa ry’abantu.