POLISI Y'U RWANDA

Abaturage bo mu karere ka Rutsiro mu ntara y’Uburengerazuba bakanguriwe kwirinda no kugira uruhare mu kurwanya  ibyaha birimo ihohotera rishingiye ku gitsina, irikorerwa abagore n’abana, n’ubucukuzi bw’amabuye y’agaciro mu buryo bunyuranyije n’amategeko.

Ibi babikanguriwe mu biganiro bahawe ku itariki 7 Nyakanga 2015  n’abayobozi batandukanye barimo Umuyobozi w’aka karere wungirije ushinzwe ubukungu,Nsanzimfura Jean Damascène, umukozi w’Ikigo cy’igihugu gishinzwe kubungabunga ibidukikije (REMA), Umuyobozi w’Ishami rya Polisi y’u Rwanda rishinzwe kurwanya ihohoterwa rishingiye ku gitsina n’irikorerwa abana (Gender-Based Violence and Child Protection Department) Superintendent of  Police (SP) Béline Mukamana , n’umuvugizi wa Polisi y’u Rwanda mu ntara y’Uburasirazuba, SP Emmanuel Hitayezu.

Polisi y’u Rwanda ifite imodoka eshatu zirimo ibiro (Mobile Police Station)  byakirirwamo ibibazo by’abaturage,izo modoka  zikaba zijya mu bice bitandukanye by’igihugu muri iyo gahunda  yo kwegereza serivisi abaturage , cyane cyane abatuye kure ya sitasiyo za Polisi.

Iyo ibyo bibazo  bimaze kwakirwa, iby’inshinjabyaha bikurikiranwa na  Polisi y’u Rwanda n’aho iby’imbonezamubano byoherezwa mu zindi nzego zishinzwe kubikemura.

Ubutumwa  bwo kurwanya ihohotera rishingiye ku gitsina ,irikorerwa abagore n’abana  ndetse no kurwanya ubucukuzi bw’amabuye y’agaciro mu buryo bunyuranyije n’amategeko n’ibindi byaha muri rusange bwahawe abaturage bo muri aka karere bari bitabiriye kiriya gikorwa cyo kubegereza serivisi hakoreshejwe imwe muri ziriya modoka, kuri uwo munsi bwatangiwe aho yari yagiye mu kagari Mbeli, mu murenge wa Rusebeya.

Uretse abapolisi baba bari muri iyo modoka bakiriramo ibibazo by’abaturage, aho iba yagiye haba hari ushinzwe kunganira abaturage mu butabera ku rwego rw’akarere (Maison d’Accès à la Justice-MAJ) ndetse n’ubuyobozi bw’aho iba yagiye.

SP Mukamana yasobanuriye  abaturage bari bitabiriye icyo gikorwa ko ibyaha by’ihohotera rishingiye ku gitsina rikorerwa abagore  birimo kubakubita no kubakomeretsa, kubatuka, kubatota no kubahoza ku nkeke, kubavunisha,no kubakoresha imibonano mpuzabitsina ku gahato.

Yavuze ko ibyaha by’ihohotera bikorerwa abana birimo kubaha ibihano biremereye nko kubakubita , kubavana mu ishuri no kutabaha ibyangombwa nkenerwa ku baririmo kandi ababyeyi cyangwa abarezi babo bafite ubushobozi, kubakoresha imirimo ivunanye, kubatuka, kubasambanya ku mbaraga, kubata, kutabandikisha bavutse, gukuramo inda, kubica , no kubacuruza.

Yasobanuriye amategeko ahana biriya byaha  kandi ababwira ko ibiyobyabwenge nk’urumogi, Kanyanga n’inzoga zitemewe z’inkorano zirimo Ibikwangari na Nyirantare biri ku isonga mu bitera ababinyoye gukora biriya byaha cyane cyane  iby’ihohotera rishingiye ku gitsina, irikorerwa abagore n’abana.

SP Mukamana yababwiye kandi ko ibiyobyabwenge uretse guteza ababinyoye gukora biriya byaha, binateza ubukene ubinywa ndetse n’umuryango we muri rusange, kandi ko biteza amakimbirane mu miryango yabo ndetse n’uburwayi butandukanye ubinywa.

Yagize ati:"Ingaruka z’ihohotera rishingiye ku gitsina, irikorerwa abagore  n’abana ntizigera gusa ku warikorewe ahubwo zigera no ku muryango we,  akaba ariyo mpamvu buri wese akwiye kumva ko  urugamba rwo kurirwanya no kurikumira rumureba".

Yagiriye inama abaturage b’aka karere yo kujya bitabira Umugoroba w’ababyeyi, aha akaba yarabasobanuriye ko ari urubuga rwiza rwo gushakira umuti urambye ibibazo birimo amakimbirane biba biri mu miryango imwe n’imwe.

SP Hitayezu yagiriye inama abaturagae b’aka karere kutanywa, kudatunda no kudacuruza ibiyobyabwenge kandi abasaba kujya bihutira gutanga amakuru ku gihe y’ababikora.

Yabasobanuriye ko ibiyobyabwenge bitera ababinyoye gukora ibyaha birimo gukubita no gukomeretsa, ubujura, gufata ku ngufu, no gusambanya abana ku mbaraga, kandi ko biri mu bitera ababinyoye guhohotera abagore n’abana.

Yabakanguriye  kandi kwirinda amakimbirane ariko kandi mu gihe abayeho bakisunga Polisi y’u Rwanda n’izindi nzego zirimo iz’ubutabera n’ubuyobozi bw’ibanze kugira ngo zibakiranure n’abo bafitanye ibibazo aho kwihanira nk’uko  bamwe bajya babigenza.

SP Hitayezu yabwiye abaturage b’aka karere kwirinda igikorwa icyo aricyo cyose kinyuranyije n’amategeko kandi abasaba kujya bihutira gutanga amakuru ku gihe yatuma gikumirwa kandi yatuma hafatwa abagikoze cyangwa abategura kugikora.

Yabakanguriye kandi gukaza amarondo no kuba ijisho ry’umuturanyi kugira ngo bakumire ikintu cyose gishobora guteza umutekano muke.

Nsanzimfura yashimiye Polisi y’u Rwanda kubera iyi gahunda yo kwegereza serivisi abaturage ikoresheje buriya bwoko bw’imodoka, aha akaba yaravuze ko inama zagiriwe abaturage zizatuma barushaho kurwanya ibyaha aho batuye.

Duhuze yabwiye abaturage kwirinda ubucukuzi bw’amabuye y’agaciro mu buryo bunyuranyije n’amategeko, aha akaba yarababwiye ko uretse kuba binyuranyije n’amategeko, ibyo bikorwa bikomeretsa abantu ndetse bikanahitana abandi.

Kuri uwo munsi hakiriwe ibibazo 17 birimo 10 by’inshinjabyaha naho ibisigaye bikaba byari iby’imbonezamubano.

Iby’inshinjabyaha bizakurikiranwa na Polisi y’u Rwanda naho iby’imbonezamubano bikaba bizashyikirijwe inzego zindi zibishinzwe kugira ngo zibikurikirane  kandi zibikemure.

Umwe mu baturage bari bitabiriye iki gikorwa  witwa Mbamubanzi Jean de Dieu wari ufite ikibazo cy’uko yakubiswe akanakomeretswa  yagize ati:"Ntako Polisi yacu itagira ngo itwegereze serivisi.Nayigejejeho ikibazo cyanjye kandi ndizera ko izagikemura.Iyi gahunda n’ingirakamaro pe!.

Yiyemeje kutarebera ikibi ahubwo ko uretse kukirinda azajya anaha amakuru Polisi y’u Rwanda n’izindi nzego zirimo ubuyobozi bw’ibanze ajyanye n’ikintu cyose abona gishobora guhungabanya umutekano.