Kinyarwanda
English
Ku itariki ya 15 Gashyantare ubuyobozi bw’akarere ka Rutsiro na Polisi y’u Rwanda basuye abanyeshuri bo mu rwunge rw’amashuri rwa Kigeyo. Abanyeshuri baganirijwe ku bubi bw’ibiyobyabwenge no gutwara inda imbura gihe.
Ushinzwe guhuza ibikorwa bya Polisi y’u Rwanda ndetse n’imikoranire myiza yayo n’izindi nzego ndetse n’abaturage mu gukumira ibyaha Assistant Inspector of Police (AIP) Jean Bosco Mugenzi mu kiganiro yatanze, yasobanuriye aba banyeshuri amoko y’ibiyobyabwenge ndetse n’ububi bwabyo.
Yabagaragarije ko mu karere ka Rutsiro ibiyobyabwenge bikunze kuhaboneka ari urumogi ndetse n’inzoga z’inkorano. Yasabye aba banyeshuri kubyirinda ndetse bakarenga imyumvire ishaje yo kuvuga ko umunyeshuri wanyweye ibisindisha ariwe ufata vuba mu ishuri.
Yagize ati” Nta cyiza cy’ibiyobyabwenge n’ibindi bisindisha, mugomba kurenga imyumvire mibi y’ababashuka ko iyo wanyweye igisindisha umenya ubwenge. Ntibibaho, ibiyobyabwenge nyine bituma ubwonko budakora neza,nta bwenge wagira wabinyoye”.
Yakomeje akangurira aba banyeshuri kujya batanga amakuru y’abari mu bikorwa byo gucuruza no gukwirakwiza ibiyobyabwenge aho batuye.
Nyuma y’ibi biganiro aba banyeshuri bo muri GS Kigeyo bashinze itsinda ryo kurwanya ibiyobyabwenge (Club anti Drugs) izajya ihuza abanyeshuri bakaganira ku bubi bw’ibiyobyabwe hagati y’abo umunsi ku wundi.
Umuyobozi mukuru muri ibi biganiro yari umuyobozi w’akarere ka Rustiro Madamu Ayinkamiye Emmerence. Mu kiganiro yatanze yasabye abanyeshuri kwirinda ikintu icyo aricyo cyose cyabatesha amahirwe yo kwiga cyane cyane abakobwa bakirinda ko baterwa inda.
Yabasabye kwirinda amaraha kuko ariho haturuka gushukishwa utuntu bakabatera inda imbura gihe.
Yagize ati” Hanze aha hari abagabo n’abasore babashukisha utuntu bakabatera inda, ibi mugomba kubyirinda mukihesha agaciro, mukanyurwa n’uko mubayeho. Mugomba kumenya ko ari mwe bayobozi b’u Rwanda rw’ejo, kuri ubu umunani wanyu ni amashuri, mwirinde rero ikintu cyatuma mudakomeza amashuri yanyu “.
Yakomeje asaba aba banyeshuri isuku kuyigira umuco, haba ku myambaro yabo, ku mubiri aho bigira ndetse n’aho bataha iwabo mu rugo.
Mu gusoza, abanyeshuri bahawe umwanya batanga ibitekerezo. Bashimiye Polisi y’u Rwanda ndetse n’ubuyobozi bw’akarere uburyo babegereye bakabaganiriza ku buzima bwabo bw’ejo hazaza.
Bizeje abayobozi ko bagiye kuba abafatanyabikorwa mu gukumira ibyaha muri bagenzi babo ndetse n’aho bataha iwabo ku midugudu. Ibi biganiro bikaba byari byitabiriwe n’abanyeshuri 718 ndetse n’abarezi babo 42,bose bakaba baba muri iki kigo cy’amashuri GS kigeyo.
