Kinyarwanda
English
Polisi y’u Rwanda ikorera mu karere ka Rulindo yafatanye Ingabire Mohamed w’imyaka 31, amacupa 20 ya Whisky (Chivas) ya magendu.
Umuvugizi wa Polisi y’ u Rwanda mu ntara y’amajyaruguru, Chief Inspector of Police (CIP), André Hakizimana, yavuze ko yafatiwe hafi ya bariyeri ya Polisi yari mu kagari ka Mukoto, umurenge wa Bushoke ku itariki 5 Werurwe ahagana saa tatu n’igice z’ijoro.
Yagize ati:" Ingabire n’uwari amuhetse kuri moto ifite nomero za purake RB 329S bakibona bariyeri ya Polisi muri metero nke, barahindukiye bashaka gusubira inyuma. Uwari amuhetse yahise ayivaho ariruka maze Polisi ihita ihagera ifata Ingabire n’iyo moto".
Yagize ati:"Abantu bakwiye kwirinda magendu ahubwo bagakora ubucuruzi mu buryo bwemewe n’amategeko".
Yakanguriye abaturage kwirinda ibyaha muri rusange no gutanga amakuru ku gihe ku kintu cyose gishobora guhungabanya umutekano.
Itegeko nomero 25/2005 ryo ku wa 04/12/2005 rigena imitunganyirize y’isoresha mu ngingo yaryo ya 37, riteganya igihano cy’igifungo kuva ku mezi 6 kugeza ku mwaka umwe.
