POLISI Y'U RWANDA

Mu nama yahuje Polisi n’abatwara abagenzi kuri moto  bagera kuri 76 bo mu mirenge ya Masoro na Murambi mu karere ka Rulindo, kuri uyu wa gatatu tariki ya mbere Ukwakira, abakora uwo mwuga bakanguriwe kubahiriza amategeko y’umuhanda no kuwukoresha neza, birindaimpanuka zo mu muhanda, banasabwa kurwanya ibiyobyabwenge n’ibindi byaha.

Assistant Inspector of Police (AIP) Dusengimana Emmanuel, ushinzwe guhuza iikorwa bya Polisi n’iby’abaturage ( DCLO ) karere kaRulindo, yabibukije ko bagomba gukora akazi kabo neza bakanoza umwuga wabo wo gutwara moto kandi bubahiriza amategeko.

Yababwiye ko bagomba kwirinda umuvuduko ukabije, bakirinda kunyura ku bindi binyabiziga ahantu hadakwiye, kugirango birinde impanuka zitwara ubuzima bw’abantu.

Yabashimiye ubufatanye bwiza buri hagati yabo n’inzego z’umutekano mu gukumira no kurwanya ibyaha, maze abasaba gukomeza gushyiramo ingufu no gukomeza kubumbatira umutekano.

AIP Dusengimana yasabye abatwara za moto kujya  batwara abantu bitonze kandi bagatwara ari uko bafite ibyangombwa bibemerera kujya mu muhanda harimo impushya zo gutwara ibinyabiziga, n’ibindi isabwa n’amategeko.

Yasoje abasaba gukomeza gufatanya n’inzego z’umutekano mu rugamba rwo ku kurwanya no gukumira ibiyobyabwenge,kuko ngo akenshi usanga ibiyobyabwenge birimo urumogi bikwirakwiza hirya no hino kandi ababikora akenshi bakaba bakunze kugenda kuri za moto.

Umwe mu bitabiriye  iyi nama  Uwiringiyimana Paulin, yavuze ko iyi nama ari ingirakamaro kuko ngo hari bagenzi be basangiye uyu mwuga bakora amakosa yo mu muhanda ndetse anashobora kuvamo impanuka.

Yavuze ko bagiye gukomeza kubahiriza amategeko  kuko kutayubahiriza bishobora kubaviramo kubura ubuzima.

Yanagiriye inama bagenzi be, abasaba  gutanga serivise nziza  abo batwara, kandi bakarangwa n’isuku bakanarushaho kubahiriza amategeko.