POLISI Y'U RWANDA

Ibyaha by’ihohotera rishingiye ku gitsina n’irikorerwa abana ni bimwe mu byaha bikuze kugaragara mu mirenge ya Murambi na Masoro yo mu karere ka Rulindo. Kuri uyu wa Gatatu tariki ya 25 Nzeri, ubuyobozi bwa Polisi bukorera muri iyo mirenge yombi  n’abanyamabanga Nshingwabikorwa b’iyo mirenge bagiranye inama  n’abaturage batuye muri iyo mirenge.

Mu kiganiro cyatanzwe n’umuyobozi wa Polisi mu mirenge ya Murambi na Masoro Chief Inspector of Police (CIP) Jean de Dieu Sibomana yasabye abaturage kwirinda  ihohotera rishingiye ku gitsina rikunze kubera mu miryango ndetse n’ihohotera rikorerwa abana. Yagaragarije abaturage ko umuryango urangwamo ihohotera udashobora gutera imbere ndetse n’igihugu ubwacyo kigasubira inyuma mu majyambere.

Yagize ati: ”Muri iyi mirenge hakunze kumvikana ihohotera rishingiye ku gitsina aho  bamwe mu bagabo bakubita abagore babo cyangwa bakabahoza ku nkeke, ibi bibazo bigera no kubana mu muryango bigatuma batabasha kwiga ndetse bakabura uburere. Ibi byose bidindiza iterambere ry’ umuryango ndetse  n’igihugu muri rusange.”

CIP Sibomana yagaragarije abaturage ko ahanini ibitera iri hohotera mu miryango ari ikoreshwa ry’ibiyobyabwenge ndetse n’izindi nzoga zadutse zitemewe. Asaba abaturage kuzirinda ahubwo bakajya bihutira gutanga amakuru y’aho bazibonye.

Yagize ati: ”Hadutse inzoga zitemewe zitwa za nyira ntare, yewe muntu n’izindi zitandukanye, hari n’abakoresha ibiyobyabwenge birimo urumogi. Ibi byose iyo mumaze kubisinda niho mutaha muhohotera abo mwasize mu rugo mukanakora ibyaha by’urugomo no gufata abana ku ngufu.”
 
Yaboneho kwibutsa abaturage ko leta itazihanganira umuntu wese uhohotera undi  noneho uzagaragara ko yabikoreshejwe n’ibiyobyabwenge we azahanirwa ibyaha byinshi. Yakomeje ashimira abaturage batanga amakuru yo kurwanya ibyaha, asaba n’abandi kujya begera inzego z’ibanze bazigezeho amakuru y’ikintu cyose babona kibahungabanyiriza umutekano mu  mudugudu wabo.

Zirimwabagabo Eduard, umunyamabanga nshingabikorwa w’umurenge wa Murambi yashimiye Polisi y’u Rwanda kuba yaje kuganiriza abaturage  kuko ibiganiro nk’ibi bibahwitura bakamenya ko umuntu agomba kubaha undi kandi bakamenya ko hari n’amategeko arengera abanyantege nkeya. Ariko cyane cyane bakamenya ko igihe umuryango umeze neza bigera no ku gihugu kigatera imbere.

Yagize ati: ”Umuryango utarangwamo amakimbire, ihohotera n’ibindi byaha muri rusange utera imbere. Ibi kandi bituma n’igihugu gitera imbere kuko abaturage baba bagize igihe cyo gukora bakiteza imbere, turabasaba kwitandukanya n’ikintu cyose cyatuma mujya mu byaha mugafungwa.”

Yasabye abayobozi b’imidugudu n’utugari kujya begera abaturage bakumva ibibazo bafite bakabafasha kubikemura ibinaniranye bigakemurirwa mu nteko z’abaturage.

Abaturage bagera ku 1500 bari bitabiriye iyi nama bahawe umwanya batanga ibitekerezo, bagaragaza ko bishimiye inama bagiriwe, bizeza abayobozi kujya batanga amakuru y’ahakigaragara  ibiyobyabwenge n’inzoga zitemewe ndetse ko bazajya batangira amakuru ku gihe.