Abagize Komite z’abaturage zo kwicungira umutekano (CPCs) basaga 150 bo mu murenge wa Mbogo mu karere Ka Rulindo bagiranye ibiganiro na Polisi ikorera muri aka karere  basabwa guhora batekereza ku nshingano zabo, barushaho  gukorana n’izindi nzego mu gutangira amakuru ku gihe kubishobora guhungabanya umutekano mu midugudu batuyemo.

Ibi biganiro byatanzwe mumpera z’icyumweru gishize bibera mu murenge wa Mbogo akagari ka Bushari biyobowe na Nzeyimana Jean Vedaste Umunyamabanga Nshingwabikorwa w’uyu murenge ari kumwe na Assistant Inspector of Police (AIP) Sam Ngororano ushinzwe guhuza ibikorwa bya Polisi n’abaturage hagamijwe gukumira ibyaha muri aka Karere.

Nzeyimana Jean Vedaste yibukije abagize izi Komite z’abaturage zo kwicungira umutekano ko bakwiye guhora basigasira icyizere bafitiwe n’abaturage buzuza inshingano bahawe.

Yagize ati:’’ Muri bamwe mubavuga rikumvikana hirya no hino mu midugudu mutuyemo, mukwiye guharanira ko abaturage bahora babibonamo, mugira uruhare mu kunga imiryango ibanye mu makimbirane, mwibutsa abaturage kwicungira umutekano binyuze mu gukora amarondo.’’

AIP Ngororano yashimiye abagize komite zo kwicungira umutekano mu midugudu batuyemo uruhare bakomeje kugira, bafasha Polisi gukumira ibyaha bitandukanye.

Yagize ati:’’Ubukangurambaga bwanyu mu gukangurira abaturage kutijandika mu byaha bwagabanyije umubare w’ibyaha birimo, ihohoterwa, amakimbirane yo mu muryango. Gutangira amakuru ku gihe nabyo byafashije Polisi gutahura abanyabyaha batandukanye, barimo abacuruza ibiyobyabwenge birimo urumogi ndetse n’inzoga z’inkorano.’’

AIP Ngororano asoza agaragaza ko n’ubwo ibyaha bigenda bigabanuka inzira ikiri ndende, asaba buri wese guhora azirikana inshingano ze.

Yagize ati:’’ Mugomba guhora mufite amakuru y’uko umutekano uhagaze iwanyu mu midugudu, mu gihe mugize icyo mumenya gishobora kuwuhungabanya, mukwiye kwihutira gutanga amakuru kugira ngo bikumirwe bitaraba, izo nizo nshingano z’ibanze buri wese akwiye guhora azirikana.’’

Komite z’abaturage zo kwicungira umutekano (CPCs) zashyizweho mu mwaka wa 2007, zikaba zigizwe n’ abaturage b’ inyangamugayo  batorwa na bagenzi babo bagakorera ku rwego rw’akagari n’umurenge  aho bakusanya bakanatanga amakuru afasha mu gukumira no kurwanya ibyaha.