Kinyarwanda
English
Kuri uyu wa 21 Ukwakira, urubyiruko nyarwanda rw’abakorerabushake mu gukumira no kurwanya ibyaha (RYVCPO) bo mu karere ka Ruhango bakoze igikorwa cy’urukundo aho bakoze umuganda wo gukorera isuku abasigajwe inyuma n’amateka bo mu kagari ka Munini mu murenge wa Ruhango.Nyuma y’icyo gikorwa uru rubyiruko rwasabwe gukomeza kuba intangarugero mu rundi rubyiruko no ku baturage muri rusange.
Muri uwo muganda w’isuku mu basigajwe inyuma n’amateka, hacukuwe ubwiherero 3 , gutera igipande amazu 3, guhinga no gutera intabire y’ibishyimbo , kubaka igikoni kandi hanatangwa amasabune n’imyenda yo kwambara ku miryango 27 n’ibindi bikorwa by’isuku.Ni ibikorwa bifite agaciro k’ibihumbi bigera kuri 325 mu mafaranga y’u Rwanda.
Nyuma y’iki gikorwa, ushinzwe guhuza ibikorwa bya Polisi n’izindi nzego mu karere ka Ruhango( DCLO) Insepector of Police (IP) Angelique Abijuru yaganiriye n’uru rubyiruko aho mu butumwa yahaye uru rubyiruko yarushimiye igikorwa bakoze kuri uwo munsi ariko anabashimira uruhare rwabo rwa buri munsi mu guharanira icyateza imbere u Rwanda cyane cyane mu bikorwa byo kurwanya no gukumira ibyaha.
IP Abijuru yabibukije ko bagomba gukomeza kuba ijisho ry’umutekano batangira amakuru ku gihe aho yagize ati:”Buri muntu agomba kuba ijisho rya mugenzi we, nimwe jisho ry’umutekano , ni namwe mbaraga z’igihugu, musabwe gukomeza kuba maso mu kumira icyo aricyo cyose cyahungabanya umutekano w’abaturage ; icyo musabwa nta kindi ni ugutangira amakuru ku gihe.”
Nahayo Jean Marie , umuyobozi w’umurenge wa Ruhango nawe wari witabiriye ibyo bikorwa nk’umushyitsi mukuru, yashimiye uru rubyiruko ku gikorwa bakoze cyo gufasha abaturage kugera ku isuku aho yagize ati:”Ndabashimira kubw’iki gikorwa cy’urukundo mwakoze uyu munsi,ariko n’ubundi ibikorwa by’urukundo no gukorera abanyagihugu murabisanganywe ahubwo mukomereze aho, tubari inyuma igihe cyose.”
Uyu muyobozi yanabonyeho gusaba abaturage kubungabunga ibikorwa baba bagejejweho,aboneraho abaturage bari aho kubyara abo bashoboye kurera, kugira isuku mu ngo zabo no ku mubiri.
Nsaziyinka Prosper uhagarariye urubyiruko rw’abakorerabushake mu gukumira no kurwanya ibyaha mu karere ka Ruhango yashimiye ubufatanye Polisi idahwema kubagaragariza ndetse n’abandi bayobozi mu nzego z’ibanze, aboneraho gushimira uru rubyiruko gukomeza ibikorwa bifasha abaturage maze asoza agira ati:” Tugiye gukomeza gufatanya n'abaturage, turushaho gutangira amakuru ku gihe y'abacuruza ibiyobyabwenge n'ibindi bihungabanya umutekano, buri wese arangize inshingano ze ku rwego rwe, kandi turushaho kwitabira amarondo"
Uru rubyiruko nyarwanda rw'abakorerabushake mu gukumira ibyaha (RYVCPO), rugizwe n'abanyamuryango barenga ibihumbi icumi mu gihugu hose, bakaba bakora ibikorwa bitandukanye by'ubukorerabushake birimo kubakira imwe mu miryango itishoboye, kuyirihira ubwisungane mu kwivuza no kuyoroza amatungo, rugakora kandi ubukangurambaga mu kurwanya ibiyobyabwenge, ruswa n'ibindi.
