POLISI Y'U RWANDA

Abanyeshuri bo mu kigo cy’ishuri ribanza rya AMIZERO bagiranye ikiganiro na Polisi y’u Rwanda ikorera mu karere ka Ruhango k’uburenganzira bw’umwana n’ihohoterwa rimukorerwa. Ibi biganiro byabaye ku itariki ya 16 Gashyantare.

Ibi biganiro byitabiriwe n’abanyeshuri magana ane na mirongo irindwi na batanu(475) bari kumwe n’abarezi babo. Ibiganiro byatanzwe n’ushinzwe imikoranire myiza no guhuza ibikorwa bya Polisi y’u Rwanda n’izindi nzego ndetse n’abaturage hagamijwe gukumira ibyaha mu karere ka Ruhango Chief Inspector of Police (CIP) Angelique ABIJURU, ari kumwe n’umuyobozi w’ishuri MUHAWENIMANA Dominique.

Mu kiganiro yahaye abanyeshuri, umuyozi w’ikigo Muhawenimana Dominique yagize ati: “umwana warezwe neza arangwa n’ikinyabupfura n’umuco. Ibyo rero birigwa, ukabyigishwa n’ababyeyi bakubyaye cyangwa n’undi wese wakurera n’ishuri rigashyiraho akaryo.”

Yakomeje agira ati:” uburere buruta ubuvuke, niyo mpamvu mugomba kubaha abarezi banyu kuko aribo muvomaho ubumenyi, utubashye ukurera,ukwigisha cyangwa ukuruta, uwo uruta ntabwo yazigera umenya uburenganzira bwawe cyangwa ubw’undi.

Yagize ati”abana nimwe Rwanda rw’ejo mufite uburenganzira bwo kwiga, kuvuzwa , kurya n’ibindi. Rero ukuvukije ibyo byose aba aguhohoteye. Mukwiye gusobanukirwa ubwo burenganzira, mukirinda uwo ariwe wese wabavutsa uburenganzira bwanyu abashukisha uduhendabana.”

Aganira n’aba banyeshuri, CIP Abijuru, yagarutse ku burenganzira bw’abana, ibibagenewe ibyo bagomba guhabwa n’ababyeyi,abarimu,igihugu ndetse n’undi wese ufite inshingano ku mwana.

Yaravuze ati” Bana mu kwiye kumvira no kubaha ababyeyi banyu n’ababarera. Uburenganzira bw’umwana buhera kuri wowe ubwawe bukagera no ku bandi,umwana ntakwiye gukoreshwa imirimo ivunanye cyangwa y’agahato n’ibindi bihungabanya uburengazira bwe. Mufite uburenganzira bwo kwiga, ariko mukanamenya ko ari n’inshingano kuri mwe kuko ariho muzigira bwa burere,uburenganzira bw’ikiremwa muntu n’indangagaciro nyarwanda.”

Yongeye kubibutsa ko bagomba kwirinda umuntu waza abashukisha uduhendabana n’impano, ndetse n’uwabashuka ababwira ko agiye kubashakira ishuri ahantu heza, kubashakira akazi gahemba amafaranga menshi kandi babajyanye kubacuruza ndetse no mu mitwe y’iterabwoba.

CIP Abijuru yaragize ati”Ikindi mukwiye kudatwarwa n’irari mukanyurwa n’uko muri n’ibyo mufite, mukirinda ababashora mu ngeso mbi z’ubusambanyi babashukisha ibintu, ababashora mu biyobyabwenge, ababakoresha imirimo ivunanye babakangisha amafaranga n’ibindi bihutaza uburenganzira bwanyu mukabirwanya.”

Yashoje akangurira abanyeshuri kutihererana ibibazo bakajya babiganiriza ababyeyi n’abarezi babo ,kuganira hagati yabo ubwabo uwo basanze afite ikibazo bakagishyikriza ababarera cyangwa Polisi ibegereye.