Kinyarwanda
English
Abamotari bibumbiye muri Koperative zitwara abagenzi mu murenge wa Kabagari mu karere ka ruhango bibukijwe uruhare bafite mu gukumira impanuka zo mu muhanda bubahiriza amategeko n’amabwiriza awugenga.
Ni muri urwo rwego mu mpera z’icyumweru gishize Polisi ikorera mu karere ka Ruhango yaganirije abamotari basaga 80 bakorera mu murenge wa kabagari uko barushaho gukumira impanuka barwanya abatubahiriza amategeko y’u muhanda.
Assistant Inspector of Police (AIP) Felix Ndayisaba ushizwe guhuza ibikorwa bya Polisi n’abaturage hagamijwe gukumira ibyaha mu karere ka Ruhango yagarutse ku makoza ateza impanuka abamotari bakwiye kwirinda.
Yagize ati “Hari bamwe muri bagenzi banyu usanga bagendera ku muvuduko ukabije, abandi bagatwara badafite ibyangombwa, hari n’abo usanga batwara banyoye ibisindisha, abandi bagaparika ahatemewe buri wese akwiye kumva ko kubirwanya ari inshingano za buri wese.’’
AIP Ndayisaba yasabye aba bamotari gukora cyinyamwuga bagahesha agaciro umwuga bakora
Yagize ati “Hari abagira uruhare mu byaha bitandukanye aho usanga batwaye ibiyobyabwenge abandi bagakora batagira koperative babarizwamo ibi byose bihesha isura mbi umwuga wanyu mu kaba musabwa ku barwanya mutanga amakuru ku baba babikora.’’
Aba bamotari bashimiye Polisi umwanya ifata ikabahugura uko barusha kunoza umwuga wabo bizeza ubufatanye mu kurwanya abakora batagira amakoperative ndetse n’abagira uruhare mu gutunda no gukwirakwiza ibiyobyabwenge mu gihugu.
