POLISI Y'U RWANDA

Mu rwego rwo gukomeza gushishikariza komite z’ubutabera n'amahoro bo muri Paruwasi ya Ruhango gufatanya na Polisi y’u Rwanda gukemura impaka, amakimbirane n’ihohoterwa bikigaragara mu muryango nyarwanda, ku itariki 18 Ukwakira Polisi y’u Rwanda ikorera muri ako karere ifatanyije n'umuryango Gotolika w'ubutabera n'amahoro (Justice et Paix), abagize izi komite n’abari mu matsinda yo gukumira no kurwanya ihohoterwa rishingiye ku gitsina n’irikorerwa abana (Anti GBV) crimes n’abo bashakanye bose bagera kuri 350 bahuguwe ku kwirinda no kurwanya ihohoterwa rishingiye ku gitsina no gukemura impaka n’amakimbirane.

Afungura aya mahugurwa, Padiri mukuru wa Paruwasi ya Ruhango Gasore Janvier yahamagariye abayitabiriye kwita ku burere bw’ abana babo no kwirinda amakimbirane mu ngo.

Yaravuze ati:”Umuryango ni ishingiro rya byose birimo n'iterambere, twese dufite inshingano zo kuwurengera, twita ku burere bw’abana bacu tunarwanya ihohoterwa rishingiye ku gitsina n'irikorerwa abana."

Padiri Gasore yakomeje ababwira ko hatabayeho kwicara ngo abantu baganire ku bibazo bibugarije mu mibanire yabo, amakimbirane mu miryango ntiyakemuka, asoza abasaba ko bazarangiza aya mahugurwa bafatiye hamwe ingamba zatuma umuryango nyarwanda urushaho kubaho neza.

Inspector of Police (IP) Angelique Abijuru ushinzwe imikoranire ya Polisi y’u Rwanda n’abaturage ndetse n’izindi nzego hagamijwe ubufatanye mu kurwanya no gukumira ibyaha muri Ruhango, yabasabye ko bashishikariza abaturage kwirinda amakimbirane, kuko  agira ingaruka ku bana bo mu muryango ukimbirana, bityo bikanagira ingaruka ku rubyiruko rw’igihugu muri rusange.

Yarabasobanuriye impamvu nyamukuru  zitera ihohoterwa n’amakimbirane yo mu ngo aho yavuze ati:” Byaragaragaye ko ahanini kutita ku bana, kutamenya amategeko n’uburengenzira bwa buri muntu, kutitegure kw’abagiye gushinga ingo, ubujiji, kubana abantu batarasezeranye, ubukene, ubushoreke,  kutubahana n’imyumvire micye ku ihame ry’uburinganire, izi zose ni zimwe mu mpamvu nyamukuru  zitera ihohoterwa n’amakimbirane yo mu ngo, hakaba rero hakenewe ubufatanye bwacu twese kugirango ntihabeho guceceka kuri buri wese warikorerwa bityo uwahohotewe arenganurwe kandi uwabikoze abihanirwe.”

Yakomeje babwira ati:"Ingaruka z’amakimbirane, icyo yaba ashingiyeho cyose, ni mbi. Urugero ruri hafi ni uko iyo adakemuwe mu maguru mashya, bamwe mu bayafitanye bafata umwanzuro wo kwihanira."

Yakomeje abasaba kujya bakangurira abaturage ko abafitanye ibibazo bajya  babikemura mu bwumvikane, mu gihe babinaniwe bakagana inzego zibishinzwe kugira ngo zibakiranure aho gukora ibinyuranyije n’amategeko.