POLISI Y'U RWANDA

Abanyeshuri barenga 1200 biga mu bigo bibiri by’amashuri yisumbuye; ari byo: Urwunge rw’amashuri rw’Umubano I n’Urwunge rw’amashuri rw’Umubano II biri mu murenge wa Gisenyi, mu karere ka Rubavu, ku itariki 30 z’uku kwezi bagiranye ibiganiro na Polisi y’u Rwanda byibanze ku ngaruka zo kwishora mu biyobyabwenge n’uruhare rwabo mu kurwanya iyinjizwa ryabyo mu gihugu, itundwa, icuruzwa, inyobwa n’ikoreshwa ryabyo.

Ibi babiganirijwe n’Umwofisiye wa  Polisi y’u Rwanda  ushinzwe imikoranire yayo n’abaturage ndetse n’izindi nzego muri aka karere , Inspector of Police (IP) Solange Nyiraneza.

Yababwiye ko, gifatwa nk’ikiyobyabwenge mu Rwanda ikintu cyose gifite methanol irengeje igipimo cya zero n'ibice bitanu ku ijana (0.5%) mu bikigize, ikirengeje igipimo cya mirongo ine na gatanu ku ijana (45%) bya alukoro ; ndetse n’ikinyobwa cyose cyateganywa nk’ikitemewe n’Amabwiriza ya Minisitiri ufite ubuzima mu nshingano ze nk’uko biteganywa n’Umugereka wa I w’Iteka rya Minisitiri w’Ubuzima Nº20/35 ryo ku wa 09/6/2015 rigena ibinyobwa bitemewe n'ibindi bintu bicungwa kandi bifatwa nk’ibiyobyabwenge n'urusobe rw'imiti ikoreshwa nka byo.

Yagize ati,"Bamwe mu rubyiruko bagenzi banyu batwara inda zitateganyijwe bitewe no kunywa urumogi cyangwa ibindi biyobyabwenge.  Bamwe mu babikora bibaviramo kwandura zimwe mu ndwara zandurira mu mibonano mpuzabitsina; naho abandi bahura n’izindi ngaruka zirimo kureka ishuri no kuba ababyeyi imburagihe. Ubwo mumenye ingaruka zabyo mwirinde kubyishoramo, kandi mube abafatanyabikorwa mu gukangurira  urundi rubyiruko, ndetse n’Umuryango nyarwanda muri rusange kubireka no kubyirinda ."

IP Nyiraneza yakomeje ubutumwa bwe agira ati," Ntushobora gutsinda mu ishuri; cyangwa ngo ugire icyo wigezaho mu buzima unywa ibiyobyabwenge. Mwirinde ikitwa ikiyobyabwenge aho kiva kikagera kubera ko gishobora kwangiza ahazaza hanyu."

Yabwiye urwo rubyiruko ko abanywa ibiyobyabwenge bakora ibikorwa bibangamira rubanda nko gukubita no gukomeretsa, gufata ku ngufu, gusambanya abana n’ihohotera rishingiye ku gitsina; maze abasaba gutanga umusanzu mu kurwanya ikoreshwa n’icuruzwa ryabyo batungira agatoki Polisi ababyishoramo.

Umuyobozi w’ Urwunge rw’amashuri rw’Umubano II, Masunika Magarambe Victor yashimye Polisi ku kiganiro yagiranye n’abanyeshuri b’Ikigo abereye umuyobozi; kandi abasaba gukurikiza inama bagiriwe agira ati," Nimwubahiriza ibyo mwasabwe muzigirira akamaro munakagirire imiryango yanyu ndetse n’igihugu muri rusange. "