POLISI Y'U RWANDA

Abanyeshuri bagera kuri 650 biga mu Ishuri ryisumbuye rya Shwemu, ribarizwa mu murenge wa Rugerero, ho mu karere ka Rubavu baganirijwe na Polisi y’u Rwanda ku bubi bw’ibiyobyabwenge n’ingaruka zo kubyishoramo; kandi basabwa kubyirinda.

Babikanguriwe mu cyumweru gishize mu kiganiro bagiranye na Inspector of Police (IP) Solange Nyiraneza ; akaba ashinzwe imikoranire ya Polisi y’u Rwanda n’abaturage ndetse n’izindi nzego muri aka karere.

IP Nyiraneza yabwiye urwo rubyiruko ko ikiyobyabwenge ari ikintu cyose gihindura imitekerereze n’imyitwarire ku buryo bigira ingaruka ku buzima bw’umuntu; cyaba kinyowe, gihumetswe cyangwa gitewe mu rushinge,  ndetse n’ubundi buryo bwose cyafatwamo.

Yababwiye ko ku rutonde rw’ibiyobyabwenge harimo urumogi, Kanyanga, Mayirungi, Muriture, Chief Waragi, Suzie n’ikindi kinyobwa cyose gifite methanol irengeje igipimo cya zero n'ibice bitanu ku ijana (0.5%) mu bikigize, Kole (Kuyihumeka) na Lisansi (Kuyihumeka).

Yagize ati,"Umunyeshuri unywa ibiyobyabwenge aba yangiza ahazaza he. Bamwe muri bagenzi banyu batwara inda zitateganyijwe bitewe no kubyishoramo; ku buryo bibaviramo kwandura zimwe mu ndwara zandurira mu mibonano mpuza bitsina n’izindi ngaruka zitandukanye. Murasabwa kwirinda ibiyobyabwenge by’amoko yose; kandi mukangurire urubyiruko bagenzi banyu kutabyishoramo, mubabwira ububi bwabyo."

IP Nyiraneza yabwiye kandi abo banyeshuri ko bamwe mu bakora ibyaha birimo gukubita no gukomeretsa, ubujura no gufata ku ngufu babiterwa n’uko baba banyoye ibiyobyabwenge; aha akaba yaragize ati,"Ababinyoye bakora ibyo batatekerejeho kuko nta  bwenge n’umutimanama baba bafite. Mwirinde ikintu cyose gishobora kwangiza ubuzima bwanyu n’ahazaza hanyu muri rusange."

Kuri uwo munsi kandi Polisi y’u Rwanda mu karere ka Gatsibo yigishije abanyeshuri biga mu ishuri ribanza ryitwa Heritage Primary School amategeko yo kugenda mu muhanda.

Ukuriye Ishami rishinzwe umutekano wo mu muhanda muri aka karere, IP Janvier Renzaho yababwiye ko bagomba buri gihe kunyura ku ruhande rw’ibumoso bw’umuhanda bakurikije icyerekezo bajyamo; kandi bakanyura buri gihe ahateganyirijwe abanyamaguru.

Yababwiye ko bagomba kandi kwambuka umuhanda baciye mu mirongo itambitse y’ibara ry’umweru n’umukara; kandi mbere yo kwambuka bakabanza kureba iburyo n’ibumoso by’umuhanda  niba nta modoka irimo kuza, mu rwego rwo kwirinda ko  haba impanuka.

IP Renzaho yababwiye ko bagomba kwambuka umuhanda ari uko hamuritse ikimenyetso cy’umugabo utambuka mu rumuri rw’icyatsi kibisi; kandi na bwo bakihuta.