Kinyarwanda
English
Kuri uyu wa gatandatu tariki ya 25 Mata 2015, abapolisi bakorera hirya no hino mu gihugu, bifatanyije n’abaturage ndetse n’inzego zitandukanye mu bikorwa by’umuganda rusange ngarukakwezi. Abapolisi bakorera ku cyicaro gikuru cya Polisi y’u Rwanda ku Kacyiru, bakaba bo bakoze uwo muganda bice bibiri.
Itsinda rya mbere ryakoreye umuganda ku cyicaro gikuru cya Polisi y’u Rwanda, bakaba bakoze ibikorwa bijyanye no gutema ibyatsi no gutunganya ubusitani ndetse no gusibura imiferege y’amazi muri icyo kigo.
Irindi tsinda ryari riyobowe na Komiseri wa Polisi y’u Rwanda, Emmanuel Butera, ushinzwe ibikorwa bya Polisi y’u Rwanda, ryo ryifatanyije gukora umuganda n’Umujyi wa Kigali ndetse n’urubyiruko rutandukanye rurimo urutwara abagenzi kuri moto, bibumbiye mu mashyirahamwe yabo ariyo FERWACOTAMU na SYTRAMORWA.
Uyu muganda ukaba wakorewe mu karere ka Kicukiro, mu murenge wa Nyarugunga. Wibanze ku gutema ibyatsi no gutunganya ubusitani. Komiseri wa Polisi y’u Rwanda Emmanuel Butera, mu ijambo yagejeje ku bitabiriye umuganda mu Murenge wa Nyarugunga, yibanze ku kamaro umutekano ufite mu iterambere ry’igihugu.
Kuri iyi ngingo, yasobanuye ku buryo burambuye uburyo urwo rubyiruko rukora akazi karwo neza kubera uwo mutekano. Yakomeje avuga ko kubera ubufatanye nabo, nta n’umwe ushobora kwemera ko igihugu cyasubira inyuma.
Yashimiye abamotari kuba bakora akazi kabo neza ugereranyije na mbere, anabasaba kugira uruhare runini mu guteza imbere iki gihugu, birinda ikibi ndetse baharanira kugira ubuzima bwiza, ari nako bafatanya na Polisi kwibungabungira umutekano.
Umuyobozi w’Umujyi wa Kigali Fidèle Ndayisaba, akaba yasabye urwo rubyiruko gukomeza gusigasira ibyiza igihugu cyacu kimaze kugeraho mu rwego rw’iterambere. Aha, yabashishikarije gukomeza kwirindira amahoro n’umutekano kuko aribyo shingiro rya byose.
Yakomeje asaba urwo rubyiruko kwirinda uwo ariwe wese washaka gusubiza inyuma ibyiza abanyarwanda bamaze kugeraho, akomeza avuga ko urubyiruko igihugu cyifuza ari urwumva vuba ariko rukora ibyiza biteza imbere imibereho myiza y’abaturage.
Umuyobozi w’Umujyi wa Kigali yasoje asaba urubyiruko kwirinda ibiyobyabwenge n’izindi ngeso mbi zishobora kubangamira iterambere ryabo ry’ejo hazaza.
