POLISI Y'U RWANDA

Polisi y’u Rwanda yifatanyije n’abandi banyarwanda mu gihugu hose mu gikorwa cy’umuganda ngarukakwezi.

Ku cyicaro gikuru cya Polisi y’u Rwanda, iki gikorwa cy’umuganda cyaranzwe n’ibikorwa by’isuku birimo  gutema  ibihuru n’ibyatsi ndetse no gusibura imigende.

Iki gikorwa cyari kandi kitabiriwe n’abapolisi batandukanye barimo; n’umuyobozi wa Polisi wungirije ushinzwe imiyoborere n’abakozi, Deputy Inspector General of Police (D/IGP) Juvenal Marizamunda.

Mu karere ka Gatsibo, Polisi y’u Rwanda ihakorera yifatanyije n’abaturage b’ako karere mu gutunganya umuhanda uhuza uturere twa Gatsibo, Gicumbi na Nyagatare.

Uyu muhanda ukaba usanzwe ufasha abaturage b’utu turere guhahirana, ukaba wari warangijwe n’imvura nyinshi yaguye mu minsi yashize.

Mu turere twa Gakenke na Rusizi, naho abapolisi bahakorera bifatanyije n’abaturage  mu bikorwa  bitandukanye  byo gukora umuganda birimo gutunganya imihanda no gusibura imiferege iyobora amazi.

Naho mu karere ka Muhanga mu Ntara y’Amajyepfo Polisi y’u Rwanda ihakorera yifatanyije n’inzego zitandukanye n’abaturage gusiza ibibanza no kubumba amatafari yo kuzubaka inzu z’abatishoboye.

Polisi y’u Rwanda isanzwe yitabira igikorwa cy’umuganda kuko ari igikorwa cyo kwishakamo ibisubizo kandi bikaba bikorwa n’abanyarwanda ubwabo.

Polisi y’u Rwanda isanzwe ifasha abaturage no mu bindi bikorwa by’iterambere nka gahunda ya gira inka munyarwanda, gahunda yo gutera ibiti, kurwanya nyakatsi, ibikorwa by’ubuvuzi n’ibindi.

Iyo abaturage bateye imbere bituma mu gihugu habaho igabanuka ry’ibyaha, bityo n’umutekano ukabasha kugerwaho neza muri rusange.