POLISI Y'U RWANDA

Mu gihe tukiri mu bukangurambaga bw’iminsi 16 yo kurwanya ihohoterwa rikorerwa abagore n’abakobwa bufite insanganyamatsiko igira iti:”Rwanya ihohoterwa rikorerwa abagore n’abakobwa: Wirihishira”, Polisi y’u Rwanda ndetse n’izindi nzego za Leta bakomeje gukangurira abaturage gukumira no kurwanya ihohoterwa rishingiye ku gitsina n’ibindi byaha birishamikiyeho.

Ni muri urwo rwego ishami ry’ubuganga muri Polisi y’u Rwanda (Police Medical Batalian) ku itariki ya 5 Ukuboza ryagiye mu turere twa Rwamagana na Bugesera, rihugura abafatanyabikorwa ba Polisi y’u Rwanda mu gukumira no kurwanya ibyaha uko bakumira bakanarwanya ihohoterwa rishingiye ku gitsina.

Muri utu turere twombi abahuguwe ni abagize ihuriro ry’urubyiruko rw’abakorerabushake mu gukumira no kurwanya ibyaha (Rwanda Youth Volunteers in Community Policing), abakuru b’imidugudu ndetse n’abagize urwego rwa DASSO mu karere.

Dr CIP Jean Pierre Musoni wari mu karere ka Rwamagana, yahaye aba bafanyabikorwa ubusobanuro bw’ihohoterwa rishingiye ku gitsina, ubwoko bwaryo, impamvu z’ingenzi ziritera, ingaruka zaryo haba k’uwarikoze, uwarikorewe no ku muryango muri rusange, ingamba Leta y’ubumwe yafashe mu kurirwanya ndetse n’icyo buri wese yakora mu gihe abonye aharimo kuba ihohoterwa.

Yarababwiye ati:”Ihohoterwa ni igikorwa icyo ari cyo cyose gikorerwa umuntu atabishaka kandi kikamugiraho ingaruka mbi byaba ku mubiri, ku mitekerereze, ku mibereho ye mu by’ubukungu cyangwa se ku mutungo we ndetse no ku mibereho y’abandi. Iryo hohoterwa rishobora gukorerwa mu ngo, mu muryango mugari, mu mashuri, mu kazi mu madini n’ahandi.”

Dr CIP Musoni yasabye buri wese gushyiramo imbaraga no gushyira hamwe kugira ngo barwanye ihohoterwa.

Yanabasabye guharanira uburinganire n’ubwuzuzanye hagati y’abagize umuryango, kuko bituma abawugize batera imbere ntihanabonekemo ihohoterwa.

Aha yaravuze ati: “Uyu munsi mu rugo rwanyu umugore ashobora kubyukana igitekerezo cyubaka, mureke agishyire mu bikorwa urebe ko mudatera imbere. Niba umugabo nawe akigize nagishyire mu bikorwa, kuko kugira ibitekerezo byubaka ntibishingira ku gitsina.”

Aba bafatanyabikorwa banasobanuriwe indwara y’umwijima wo mu bwoko bwa A,B na C, (Hepatite A,B,C)  uko yandura, ibimenyetso biyiranga n’uko bayirinda. Basabwe kwisuzumisha no gushishikariza abo bayobora kwisuzumisha, kugira ngo uwanduye yivuze hakiri kare ndetse n’uwaba akiri muzima yikingize.

Mu karere ka Bugesera, ibiganiro nk’ibi byatwanzwe na Inspector of Police (IP) Jean d'Amour Nteziryayo.

Nyuma yo kubaza ibibazo no gutanga ibitekerezo, abitabiriye amahugurwa bashimiye Polisi y’u Rwanda kuri iyi gahunda nziza yo kubakangurira kwirinda no ihohoterwa n’indwara z’ibyorezo.