POLISI Y'U RWANDA

Binyuze mu Ishami ryayo rishinzwe guhuza ibikorwa bya Polisi n'abaturage, kuri uyu wa Gatandatu tariki 25 Nyakanga, Polisi y'u Rwanda yaganirije urubyiruko rwitabiriye gahunda y'ibiruhuko (Summer Camp) yateguwe na Career Center (K2) ku bufatanye bwa Polisi n'abaturage, inshingano mboneragihugu ndetse n'uruhare rw'abakiri bato mu gutuma umuryango mugari utekana. 

Ibi biganiro byabereye mu ishuri mpuzamahanga rya Ntare Louisenlund School riherereye mu Karere ka Bugesera, byahuje abapolisi n'urubyiruko rwitabiriye iyi gahunda y'ibiruhuko, bikaba byagarutse ku nshingano rusange yo kubungabunga ituze n'umutekano ndetse n'umumaro w'ubufatanye buhamye hagati y'abashinzwe iyubahirizwa ry'amategeko hamwe n'abaturage.

Abitabiriye ibi biganiro, bigishijwe indangagaciro zijyanye n'inshingano mboneragihugu, zirimo kubahiriza amategeko, ubudahemuka, ubukorerabushake no kwitanga mu bikorwa bigamije iterambere rusange. 

Komiseri w'Ishami rishinzwe guhuza ibikorwa bya Polisi n'abaturage, Assistant Commissioner of Police (ACP), Teddy Ruyenzi, yashimangiye umumaro wo kwigisha abakiri bato uruhare rwabo mu kugera ku mutekano no kubafasha kugira amahitamo meza azabageza ku buzima bwiza bw'ejo hazaza.

Yagize ati: "Abakiri bato ni zo mbaraga z'ahazaza h'Igihugu. Mu gihe rero muharanira kugera ku nzozi zanyu mukwiye guhora mwibuka kuba abaturage babereye igihugu, kugira ikinyabupfura, gukora cyane no kubahiriza amategeko ko ari indangagaciro zizabafasha kugera ku ntsinzi mu buzima bwanyu no kugira uruhare mu mutekano n'iterambere rirambye ry'igihugu."

ACP Ruyenzi yakomeje ahamagarira aba banyeshuri kwirinda ibiyobyabwenge no gukoresha neza imbugankoranyambaga.

Ati: "Amahitamo mukora uyu munsi, ni yo agena ahazaza hanyu. Mwirinde ibiyobyabwenge n'indi myitwarire mibi, mukoreshe neza imbugankoranyambaga ndetse mugendane n'abantu bazima babafasha gufata imyanzuro myiza. Ibi nimubikora, muzaba murinze ahazaza hanyu, hanyuma mube abaturage beza muharanire amahoro n'umutekano aho mutuye."

Umuyobozi Mukuru wa Career Center, Karangwa Steven, yashimiye Polisi y'u Rwanda ku ruhare rwayo mu guteza imbere urubyiruko binyuze mu masomo y'uburere mboneragihugu agendana n'ibikorwa bifatika ikora.

Yagize ati: "Iyi gahunda ihuza umurage w'umuco wacu n'ubumenyi bugezweho buzahangana mu gihe kizaza, harimo ubwenge buhangano, amarobo no kwihangira imirimo hagamijwe gutegura abayobozi bakiri bato bafite uburere, gukunda igihugu no guhanga ibishya. Turashimira Polisi y'u Rwanda ku bwo kugira uruhare muri iki cyerekezo no gushishikariza abanyeshuri bacu kuba abaturage beza."

Mbere y'ibi biganiro, abanyeshuri n'abayobozi babo bafatanyije n'abapolisi mu muganda, nk'ikimenyetso cy'indangagaciro y'ubukorerabushake no guhuza imbaraga hagamijwe ubuzima bwiza.

Iyi gahunda y'ibiruho izamara iminsi 12, ikaba iri gukorwa ku nsanganyamatsiko tugenekereje mu kinyarwanda igira iti "Twibuka inkomoko yacu, twubaka ahazaza hacu" (Tracing Our Roots, Mapping Our Future), ikaba igamije gutoza abakiri bato kuba abayobozi beza no gukuza impano zabo. Iyi gahunda yitabiriwe n'abanyeshuri bo mu Rwanda ndetse n'abaturutse mu biguhu bitandukanye bya Afurika, yatangiye ku itariki ya 20 Nyakanga, ikaba izarangira ku itariki 31 z'uku kwezi.