POLISI Y'U RWANDA

Polisi y’u Rwanda ikorera mu karere ka Musanze mu mpera z’icyumweru gishize,  yahuriye mu biganiro nyunguranabitekerezo n’inzego zitandukanye,  hagamijwe kurebera hamwe ingamba zafatwa ndetse n’uruhare rwa buri wese, mu kurwanya no gukumira ihohotera rishingiye ku gitsina, iryo mu ngo ndetse n’irikorerwa abana.

Ibi biganiro; byahuje Polisi y’u Rwanda, Umuryango nyarwanda ugamije guteza imbere ihame ry’uburinganire n’ubwuzuzanye hagati y’abagabo n’abagore mu iterambere ry’igihugu, hubakwa imyumvire n’imyitwarire myiza ya kigabo izira ihohoterwa (RWAMREC) ndetse n’Ihuriro ry’abanyarwandakazi rigamije kwimakaza umuco w’amahoro n’imibereho myiza y’abaturage (Rwanda Women's Network).

Ushinzwe imikoranire myiza hagati ya Polisi y’u Rwanda, izindi nzego ndetse n’abaturage Inspector of Police (IP)  Viateur Ntiyamira, mu kiganiro yagejeje kubari muri iyo nama nyunguranabitekerezo, yibanze ku ihohotera rikorerwa abana  n'abagore, impamvu zitera ihohoterwa, ingamba zo kurikumira no kurirwanya ndetse n’uko rihagaze mu karere ka Musanze.

IP Ntiyamira yakomeje asaba abari muri iyi nama, gufatanya kurwanya ihohotera kuko rigira ingaruka mbi ku barikorerwa, ku barikora, ku muryango nyarwanda muri rusange no ku iterambere ry’igihugu.

Ibiganiro byakomeje habaho kungurana ibitekerezo no kwerekana ibyagezweho kuva iyi miryango yombi yatangira 2014 kugeza ubu.

Iyi nama kandi yari yanatumiwemo Abanyamabanga nshingwabikorwa bose b’imirenge igize aka karere, abafatanyabikorwa bakorana nabo mu mirenge bakoreramo n'abandi.

Inama nyunguranabitekerezo nk’iyi kandi yanabereye no mu karere ka Karongi na Rwamagana.  Mu kare ka Karongi herekanywe ubushakashatsi bwakozwe n’umuryango Pro-Femme Twese hamwe  kw’ihohoterwa rikorerwa mu miryango. Abitabiriye iyo nama bifuje ko hashyirwa ingufu nyinshi mu kurihagarika  burundu cyane cyane binyuze mu  bukangurambaga.

Naho mu karere ka Rwamagana, mu izina ry’ubuyobozi bw’Akarere, Madamu Mukarugira Kamanzi ushinzwe gukurikirana ibikorwa by’abafatanyabikorwa umunsi ku munsi, yashimiye RWAMREC uruhare rukomeye yagize mu kubanisha neza ingo zari zifitanye ibibazo mu mibanire yazo ndetse anabasaba ko bakomereza aho ndetse bakagura ibikorwa byabo bagakorera mu gihugu hose. Mukarugira yanasabye abubatse ingo bahindutse kugira uruhare mu kwigisha no guhindura bagenzi babo, bityo ihohotera rishingiye ku gitsina n’ubushyamirane mu miryango bigacika vuba.

Muri izi nama nyunguranabitekerezo zo kurwanya ihohotera zabereye muri utu turere twavuzwe hejuru, Polisi y’u Rwanda hamwe n’inzego zose, biyemeje gukomeza ubufatanye mu guca burundu iryo hohotera rinyuranye.