POLISI Y'U RWANDA

Itsinda ry’abapolisi b’u Rwanda bakora mu Ishami ryayo ry’ubuvuzi bari gupima ku buntu agakoko gatera SIDA abapolisi n’abafatanyabikorwa mu kubungabunga umutekano mu karere ka Bugesera.

Biteganyijwe ko icyo gikorwa kizamara iminsi icumi; uhereye ku wo cyatangiriyeho, tariki 26 Nzeri, kikaba kizakorwa mu mirenge yose 15 igize aka karere.

Abafatanyabikorwa mu kubumbatira umutekano bapimwe harimo abagize Komite zo kubungabunga umutekano, Urwego rwunganira uturere mu kubungabunga  umutekano (DASSO), Inkeragutabara, n'imiryango y’abagize ibi byiciro.

Usibye kubapima agakoko gatera SIDA, iryo tsinda ry’abapolisi bayobowe na Inspector of Police (IP) Venuste Niyonsaba ribaterera mu nzu zabo umuti wica imibu itera Maraliya, ibiheri, n’ibindi bishobora gutera uburwayi.

Mbere yo kubapima, abagize iryo tsinda banzaga kubigisha icyo SIDA ari cyo, uko yandura, ingaruka zayo, uburyo bayirinda, n’imyitwarire mbonera y’uwagize ibyago byo kuyandura.

Mu biganiro bagirana na bo bababwira ko agakoko gatera SIDA gaterwa ahanini n’imibonano mpuza bitsina idakingiye, hanyuma bakabagira inama yo gukoresha agakingirizo, kandi bakabigisha uko ak’abagabo ndetse n’akabagore gakoreshwa.

Icyo gikorwa cyo gusuzuma abagize ibyo byiciro cyatewe inkunga na Minisiteri y’ubuzima; ibinyujije muri mushinga wayo witwa Single Project Implementation Unit (SPIU).

IP Niyonsaba yavuze ko bahereye mu murenge wa Nyamata, aho basuzumwe abagera kuri 60, naho ku munsi ukurikiyeho, ni ukuvuga tariki 28 Nzeri; basuzumye  abarenga 100 bo mu murenge wa Rweru.

Yagize ati:"Ibikorwa by’isuzuma n’ubujyanama biragenda neza, kandi turizera tudashidikanya ko bizagenda neza no mu yindi mirenge."

Umwe mu bahawe iyo serivisi y’ubuntu wo muri Rweru witwa Ruhumuriza Jonas yagize ati:"Iki gikorwa cyo kudupima ku buntu agakoko gatera SIDA ni ingirakamaro kubera ko cyatumye menya uko ubuzima bwanjye buhagaze."

Yakomeje agira ati:"Nibwiraga ko Polisi ishinzwe gusa gucunga umutekano w’abantu n’ibyabo, ariko nashimishijwe no kuba ikora ibikorwa nk’ibi bituma tugira ubuzima buzima."

Undi witwa Mukamusoni Alphonsine yagize ati:"Ikiganiro twagiranye n’abapolisi badusuzumye cyatumye ndushaho kumenya uburyo bwo kwirinda SIDA. Ndashima Polisi yacu izirikana ibyatuma tugira ubuzima buzira  uburwayi."