Kinyarwanda
English
Ibi babisabwe mu nama bahuriyemo na Minisiteri y’ibikorwa remezo, ikigo cya Leta gishinzwe imirimo imwe n’imwe ifitiye igihugu akamaro (RURA),Minisiteri y’umutekano mu gihugu na Polisi y’u Rwanda.
Minisitiri w’Umutekano mu gihugu Sheikh Musa Fazil Harelimana wari muri iyo nama yavuze ko iyo habaye impanuka abantu bakahasiga ubuzima igihugu kihatakariza byinshi.
Yakomeje avuga ko abatwara ibinyabiziga bakwiye kujya bagenzurwa cyane cyane harebwa imyitwarire yabo kuko byagiye bigaragara ko hari impanuka ziterwa n’ibintu bitandukanye birimo uburangare, ubusinzi bwa bamwe mu batwara ibinyabiziga n’ibindi. Sheikh Musa Fazil Harelimana yakomeje avuga ko abatunze ibinyabiziga bakwiye kujya bubahiriza gahunda yo kubisuzumisha ndetse bagashyira ibyuma mu modoka bifasha abatwara ibinyabiziga kumenya no kugenzura umuvuduko wagenwe.
Umunyamabanga wa Leta ushinzwe gutwara abantu n’ibintu muri Minisiteri y’ibikorwa remezo Alexis Nzahabwanimana yavuze ko abatwara ibinyabiziga bigishijwe kenshi ibijyanye no kubahiriza amategeko y’umuhanda ariko hakaba hari bamwe ndetse batari bake bakomeje kwica amategeko y’umuhanda,ibi bikagira ingaruka mbi ku buzima bw’abantu kuko hari abo zihitana ndetse zikangiza n’ibikowa remezo. Yakomeje avuga ko harimo gusuzumwa uburyo bene abo bashoferi bakomeje kwitwara gutyo bazakwa impushya zo gutwara ibinyabiziga mu bihebiri imbere hagamijwe kurengera ubuzima bw’abaturarwanda.
Umuyobozi wa Polisi y’u Rwanda wungirije ushinzwe ibikorwa DIGP Dan Munyuza yagaye abatwara ibinyabiziga bamwe barara mu tubari banywa inzoga nyamara ntibibuke ubuzima bw’abagenzi kuko iyo bukeye batwara ibinyabiziga bityo kubera umunaniro mwinshi kuko baba bataruhutse bikaba byatuma bakora impanuka.
Mu rwego rwo kumenya amasaha abatwara ibinyabiziga bakoze, ubuyobozi bw’ikigo cya Leta gishinzwe imirimo imwe n’imwe ifitiye igihugu akamaro (RURA) bwavuze ko hari amafishi azashyirwaho azajya agaragaza amasaha umushoferi akora ku munsi bityo hakazabaho kumenya niba aruhuka kuko hari igihe habaho impanuka ziterwa n’umunaniro w’abashoferi. Hazanabaho kandi kumenya no gukora igenzura hifashishijwe ikoranabuhanga rya RURA, aho abashoferi bahinduranya akazi mu bigo bitwara abagenzi hakazajya harebwa imyitwarire yabo mu kazi kabo.
Mu yyanzuro yafatiwe muri iyo nama, harimo iyi nama izajya iterana buri mezi atatu hasuzumwa uko amategeko y’umuhanda yarushaho kubahirizwa, hanemejwe kandi ko bitarenze tarikij ya 30 Ugushyingo 2015, imodoka zitwara abagenzizose zizashyirwamo ibyuma bipima umuvuduko w’ikinyabiziga ku buryo bizafasha mu guhana ababirengaho.
Hanemejwe kandi ko umushoferi uzajya witwara nabi, umwirondoro we uzajya ushyirwa kuri buri sosiyete itwara abagenzi ku buryo kujya kwaka akazi ko gutwara ikinyabiziga avuye hamwe yerekeza ahandi bitazamworohera. Abakuriye amasosiyete atwara abagenzi basabwe nabo kujya baha abashoferi amasezerano y’umurimo, ibi bikazarinda ko hari abakora uyu mwuga nta bumenyi buhagije bafite, ndetse no gutuma ko nta bifuza gukorera amafaranga menshi kubera ko nta masezerano y’umurimo baba bafite.
