POLISI Y'U RWANDA

Ni ibikoresho byafashwe mu mikwabu yakozwe na Polisi ikorera mu Mujyi wa Kigali, yakozwe mu bihe bitandukanye; nubwo byinshi muri byo byafashwe muri uyu mwaka wa 2015, hagiye harimo ibyafashwe kuva mu mwaka wa 2012, 2013 ndetse n’umwaka ushize.

Ibi bikoresho byiganjemo ibikoresho byo mu rugo birimo televiziyo zigera ku 100 z’amoko atandukanye(inini n’into), za mudasobwa zirenga 100 nazo z’amoko atandukanye(inini n’izigendanwa), za dekoderi z’ibwoko butandukanye, za DVD z’ubwoko butandukanye, amaradiyo manini y’ubwoko butandukanye byose biri mu bubiko bw’inzu ya Polisi y’Umujyi wa Kigali(Kigali Metropolitan Police) iri I Remera inyuma sa Stade Amahoro.

Nk’uko bitangazwa n’Umuvugizi wa Polisi mu Mujyi wa Kigali, Superintendent Modeste Mbabazi, ibi bikoresho byagiye bifatirwa mu mikwabu itandukanye yakozwe na Polisi mu bice bitandukanye by’Umujyi wa Kigali, ibindi byafatiwe mu mihanda kuri za bariyeri aho amamodoka yabaga abipakiye abijyanye kure y’aho byibwe, ibindi byafashwe n’amarondo, aho abajura rimwe na rimwe babikubitaga hasi bakiruka,…

SP Mbabazi atangaza ko impamvu ibi bikoresho byagiye bibikwa bikaba byinshi mu bubiko bwa Polisi, biterwa n’uko abibwe batamenya amakuru y’uko hari ibyibwe bibitswe ahantu n’ubwo Polisi ihora ibitangaza mu buryo butandukanye, ikindi ngo n’ababimenye , hari abagiye baza ariko ugasanga nta bimenyetso bihagije bitwaje bigaragaza ko ibintu ari ibyabo, bityo ntibabihabwe, ibyo nabyo bigatuma bihaguma.

SP Mbabazi yagize ati:” Turamenyesha umuntu wese waba yaribwe igikoresho kiri muri ibi tubitse, ko yaza yitwaje ibimenyetso bihagije bigaragaza ko icyo yita icye ari cyo koko, mu bimenyetso si ngombwa ko buri gihe biba impapuro, icyangombwa ni ibifite ishingiro , yabizana bigasuzumwa.”

Superintendent Mbabazi yakomeje agira inama abaturage bose kongera kuba maso mu kurinda cyane cyane ingo zabo, kuko ibyinshi bigaragara ko ariho byibwe, basiga cyangwa barindisha abo bizeye ku bikoresho byabo, yongeye kwibutsa kandi abagura ibikoresho ku masoko atemewe ko babyitondera kuko bishobora kubagusha mu bihombo, dore ko aho nta nyemezabuguzi y'ibyo  uguze baguha,ibyo bigatuma n’iyo ukibuze akenshi ubura ikigaragaza ko ari icyawe.

SP Mbabazi arangiza  yagize ati,”Abantu bafite ibikoresho nk’ibi byaba mu ngo, ku kazi  cyangwa aho babicururiza bakwiye gushyiraho ingamba zo kubicunga,ntibahe icyuho  abajura.Polisi izakomeza gukumira bene ibi byaha, kimwe n’ibindi, no gufata abibikora kugira ngo baryozwe ibyo bakoze.”