Kinyarwanda
English
Mu rwego rwo gukomeza gukangurira abanyeshuri kwirinda no kurwanya ibiyobyabwenge bitesha amashuri bamwe muri bagenzi babo bikanazahaza ubuzima bwabo, ku itariki ya 28 Kamena Polisi y’u Rwanda yakoreye ubukangurambaga bwo kwirinda ibiyobyabwenge mu bigo by’amashuri bitandukanye, aho mu karere ka Gatsibo ibi biganiro byatanzwe mu ishuri ryisumbuye (GS) rya Mugera ahari abanyeshuri 760 n’irya Nyabicwamba ryarimo abanyeshuri 1020, mu karere ka Nyagatare bitangwa mu ishuri ryisumbuye (GS) rya Nyakigando ryigamo abanyeshuri 1100 hakaba hari n’abarezi babo 52, mu karere ka Kicukiro bitangwa muri Samuduha Integrated College (SICO) ahari abanyeshuri 987, naho mu karere ka Bugesera ibiganiro nk’ibi byatanzwe mu ishuri ryisumbuye (GS) rya Rango byitabirwa n’abanyeshuri 650.
Umupolisi ushinzwe guhuza imikoranire ya Polisi y’u Rwanda n’abaturage ndetse n’izindi nzego hagamijwe ubufatanye mu kurwanya no gukumira ibyaha mu karere ka Gatsibo Chief Inspector of Police (CIP) Jean Baptiste Bucyangenda, yakanguriye abanyeshuri ba Mugera na Nyabicwamba kwirinda ibiyobyabwenge kuko bibabuza kwiga bigatuma bata amashuri yabo, ndetse bikagira n’ ingaruka ku buzima bwabo by’umwihariko n’gihugu muri rusange.
Yagize ati: “Ibiyobyabwenge bigira ingaruka mbi kandi nyinshi zirimonko kwishora mu busambanyi ukaba wahandurira SIDA cyangwa se ukaba watwara inda utiteguye, kuva mu ishuri kandi bikanakwangiriza ubuzima ndetse n’ izindi nyinshi.”
Yakomeje abasaba kwirinda ikintu icyo aricyo cyose cyabarangaza, anabasaba ko bakwita ku masomo yabo bityo bakazavamo abanyarwanda bafite ubumenyi buzabafasha kwiteza imbere bo ubwabo n’imiryango yabo, bukazanabafasha guteza imbere igihugu.
Chief Inspector of Police (CIP) Jean Claude Kaburabuza ushinzwe guhuza imikoranire ya Polisi y’u Rwanda n’abaturage ndetse n’izindi nzego, we yabwiye abanyeshuri biga muri Nyakigando ko urubyiruko arirwo igihugu gitezeho ejo hazaza heza, abasaba kudahishira uwo ariwe wese waba acuruza cyangwa se anywa urumogi.
Muri Samuduha Integrated College (SICO), ibiganiro nk’ibi byatanzwe na Assistant Inspector of Police (AIP) Ananias Gasibirege, naho muri GS Rango bitangwa na Inspector of Police (IP) Jeannine Nyiramugisha.
Muri ibi biganiro kandi, aba banyeshuri banasabwe kurwanya icuruzwa ry’abantu no kwirinda inda ziterwa abakobwa b'abangavu.
Manzi Victor wiga muri Samuduha Integrated College (SICO), yashimiye Polisi y’u Rwanda inyigisho yabahaye, kuri we akaba abona ko zigamije kubaha icyerekezo cyiza ndetse no kubafasha kuzavamo abaturarwanda babereye igihugu n’ iterambere ryacyo.
Uyu munyeshuri yasabye bagenzi be gutera intambwe ya gitwari, barwanya ibiyobyabwenge n’ibindi byaha, ndetse bagaharanira buri gihe kuba intangarugero, bakora ibyo ababyeyi ndetse n’ igihugu kibategerejeho.
