Kinyarwanda
English
Polisi y’u Rwanda mu turere twa Rulindo, Ngororero na Ruhango, mu cyumweru gishize ku itariki 23 z’uku Kwezi yagiranye ibiganiro n’abanyeshuri bagera ku 3000 biga mu bigo bine, ibabwira ububi bw’ibiyobyabwenge n’ingaruka zo kubyishoramo , inabakangurira kubyirinda no gufatanya gukumira no kurwanya iyinjizwa ryabyo mu gihugu, icuruzwa n’ikoreshwa ryabyo batanga amakuru yerekeye ababikora.
Abaganirijwe harimo abagera ku 1, 200 biga mu ishuri ryisumbuye ryitwa Institut Baptiste de Buberuka (IBB) riri mu karere ka Rulindo; abasaga 700 biga mu bigo bibiri byo muri Ngororero ari byo: Ecole Sécondaire Muhororo na ADEC Ruhanga; hakaba kandi abarenga 1, 200 biga muri Collège de Bethel yo mu karere ka Ruhango.
Ibiganiro byatangiwe muri Institut Baptiste de Buberuka byabanjirijwe n’igikorwa cyabereye muri iri shuri cyo kwangiza ibiyobyabwenge byafatiwe mu karere ka Rulindo mu bihe bishize bigizwe n’amasashe 2,400 ya Blue Sky , amasashe 1, 920 ya Kitoko , amasashe 2,400 ya Kick Warage, amasashe 2,400 ya African Gin, udupfunyika 480 twa Mayirungi , bule 106 z’urumogi na litiro 26 za Kanyanga.
Aganira n’abiga muri Institut Baptiste de Buberuka, ushinzwe imikoranire ya Polisi n’abaturage ndetse n’izindi nzego mu karere ka Rulindo, Inspector of Police (IP) Fidele Mbonimana yababwiye ko urumogi, Kanyanga, Mayirungi, Muriture, Chief Warage na Suzie ari byo kugeza ubu biri ku rutonde rw’ibiyobyabwenge mu Rwanda kubera ko birengeje igipimo cya mirongo ine na gatanu ku ijana (45%) bya alukoro; bikaba kandi bifite methanol irengeje igipimo cya zero n'ibice bitanu ku ijana (0.5%) mu bibigize; nk’uko biteganywa n’Itegeko N°03/2012 ryo ku wa 15/02/2012 rigena imikoreshereze y’ibiyobyabwenge n’urusobe rw’imiti ikoreshwa nka byo mu Rwanda.
Yabwiye kandi abo banyeshuri ko ku rutonde rw’ibiyobyabwenge hiyongeraho Kole na Lisansi (kubihumeka).
Yagize ati,"Bamwe mu rubyiruko bagenzi banyu batwara inda zitateganyijwe bitewe no kunywa ibiyobyabwenge. Hari abo biviramo kwandura zimwe mu ndwara zandurira mu mibonano mpuza bitsina; naho abandi bahura n’izindi ngaruka zirimo kureka ishuri no kuba ababyeyi imburagihe. Mwirinde kubyishoramo ubwo mumenye ingaruka zabyo; kandi mube abafatanyabikorwa mu gukangurira urundi rubyiruko, ndetse n’Umuryango nyarwanda muri rusange kubireka no kubyirinda ."
Mu kiganiro yagiranye n’abo muri Ecole Sécondaire Muhororo na ADEC Ruhanga, ushinzwe imikoranire ya Polisi n’abaturage ndetse n’izindi nzego muri Ngororero, Assistant Inspector of Police (AIP) Ariane Muhorakeye yababwiye ati," Ntushobora gutsinda mu ishuri; cyangwa ngo ugire icyo wigezaho mu buzima unywa ibiyobyabwenge. Mwirinde ikitwa ikiyobyabwenge aho kiva kikagera kuko kigabanya ubushobozi bw’umubiri no gutekereza. Kunywa ibiyobyabwenge ntibituma umuntu yibagirwa ibibazo asanganywe nk’uko bamwe bibwira cyangwa babeshywa; ahubwo byongera ibibazo ku bindi."
Ushinzwe imikoranire ya Polisi n’abaturage ndetse n’izindi nzego mu karere ka Ruhango, IP Angelique Abijiru yabwiye abiga muri Collège de Bethel ati,"Abanyoye ibiyobyabwenge bakora ibyaha bibangamira ituze rya rubanda birimo gukubita no gukomeretsa, gufata ku ngufu, gusambanya abana n’ihohotera rishingiye ku gitsina. Buri wese asabwa kubyirinda no gutanga umusanzu mu kurwanya ikoreshwa ryabyo n’iyinjizwa ryabyo mu gihugu atungira agatoki Polisi ababyishoramo."
