Kinyarwanda
English
Kuri uyu wa gatatu tariki ya 5 Werurwe, Polisi y’u Rwanda ifatanyije n’ubuyobozi bw’akarere ka Kirehe, n’ubushinjacyaha bukorera muri ako karere bangije ku buryo bwabugenewe ibiyobyabwenge bitandukanye birimo kanyanga litiro 214, urumogi ibiro 716, n’amapaki 66 y’inzoga za Chief Waragi.
Mbere yo kwangiza ibyo biyobyabwenge, byabanje kwerekwa abaturage b’akarere ka Kirehe barimo, abamotari, abatwara abagenzi n’imitwaro yabo ku magare bakorera muri santeri ya Nyakarambi,urubyiruko rwo muri iyo santeri, n’abandi baturage, bikaba byari mu rwego rwo kubereka ububi n’ingaruka bigira ku buzima bw’abaturage no ku gihugu muri rusange.
Mu butumwa yagejeje ku baturage bari muri icyo gikorwa, umuyobozi w’akarere ka Kirehe Bwana Protais Murayire yahamagariye abaturage kwitandukanya no gukoresha ibiyobyabwenge kuko uretse no kubakururira ibibazo byo gufungwa, bibangiriza ubuzima bityo bakagira ingaruka zitandukanye ku buzima bwabo no kubadindiza mu bikorwa by’iterambere.
Umuyobozi wa Polisi y’u Rwanda mu karere ka Kirehe Senior Superitendent of Police (SSP) Felix Bizimana yashimiye abaturage uruhare bagize mu gufatanya na Polisi n’izindi nzego kugira ngo ibi biyobyabwenge bifatwe, akomeza asaba ko ubu bufatanye bwakomereza kuri uru rwego. Yakomeje avuga ko ibi biyobyabwenge byangiza urubyiruko kandi aribo mizero y’ejo hazaza h’igihugu cyacu.
Abamotari n’abanyonzi basabwe by’umwihariko gutanga amakuru ku ikoreshwa n’icuruzwa ry’ibiyobyabwenge dore ko bamwe muri bo aribo bifashishwa mu kubikwirakwiza hirya no hino nk’uko byavugiwe aho.
Umushinjacyaha ku rwego rwisumbuye mu turere twa Ngoma na Kirehe Bwana Niyonizeye Javan yasobanuriye abitabiriye iki gikorwa ibyo amategeko ateganyiriza unywa n’ucuruza ibiyobyabwenge, akaba yabasobanuriye ko mu gitabo cy’amategeko ahana ibyaha mu Rwanda mu ngingo yacyo ya 594 ivuga ko umuntu wese unywa, witera, uhumeka, wisiga cyangwa ukoresha ubundi buryo ubwo ari bwo bwose ibiyobyabwenge n’urusobe rw’imiti ikoreshwa nka byo muburyo bunyuranyije n’amategeko, ahanishwa igifungo kuva ku mwaka umwe (1) kugeza ku myaka itatu (3) n’ihazabu y’amafaranga y’u Rwanda kuva ku bihumbi mirongo itanu (50.000) kugeza ku bihumbi magana atanu (500.000).
