Kinyarwanda
English
Ikipe ya Polisi y’umukino w’intoki wa Volleyball (Police VC) mu bagabo, yageze ku mukino wa nyuma w’igikombe cyo Kwibohora nyuma yo gusezerera ikipe ya APR VC mu mukino wazihuje kuri uyu wa Gatanu tariki 26 Nyakanga, i Remera muri Petit Stade yari imaze igihe ivugururwa.
Gutsinda APR VC muri uyu mukino amaseti 3-1, byahesheje ikipe ya Police VC kuzakina ku Cyumweru umukino wa nyuma uzayihuza n’iri butsinde hagati ya Kepler na REG kuri uyu wa Gatandatu tariki ya 27 Nyakanga.
Police VC niyo yatsinze iseti ya mbere n’amanota 25-23, iza guhita yishyurwa na APR nayo ku manota 25-23, cyakora abasore ba Police VC bayobowe n’umutoza Musoni Fred baza gushyiramo ikinyuranyo kigaragara batsinda APR VC amaseti abiri yakurikiyeho ku manota 25-22 ku iseti ya gatatu n’amanota 25-19 ku iseti ya kane, yegukana intsinzi ku maseti 3 kuri 1 ya APR VC.
Ni mu gihe mu cyiciro cy’abagore ikipe ya Police WVC iza guhura na RRA WVC kuri uyu wa Gatandatu, mu mukino uza kugaragaza ikipe izakina umukino wa nyuma na APR WVC nawo uzaba ku Cyumweru tariki ya 28 Nyakanga.
