Kinyarwanda
English
Ikipe ya Polisi y'u Rwanda mu mukino w'intoki wa Volleyball (Police VC), kuri iki cyumweru tariki ya 25 Gicurasi, yegukanye igikombe cy'irushanwa rya 21 ryo kwibuka Rutsindura (Rutsindura Memorial Tournament).
Irushanwa ry'uyu mwaka ryaberaga mu turere twa Gisagara na Huye, ryatangiye ku wa Gatandatu tariki ya 24 Gicurasi, ryitabiriwe mu bagabo n'amakipe atanu amenyerewe mu cyiciro cya mbere mu Rwanda ariyo; Police VC, Gisagara VC, Kepler VC, APR VC na REG VC.
Nyuma yo gusoza imikino y'ijonjora yitwaye neza, bikayihesha amahirwe yo gukina imikino ya 1/2 cy'irangiza, Police VC yahuye na Kepler VC iyitsinda amaseti 3-1, iza kwisanga igomba guhura ku mukino wa nyuma na REG VC wabereye muri Petit seminaire Virgo Fidelis.
Ni umukino watangiye ushyushye kandi ubereye ijisho kuko wari urimo imbaraga ku mpande zombi, buri kipe itsinda nyuma indi ikayigaranzura, cyakora uza kurangira ikipe ya Police VC itsinze ikipe ya REG VC amaseti 3 -1 biyihesha kwegukana igikombe.
Rutsindura Memorial Tournament ni irushanwa ngarukamwaka ritegurwa mu rwego rwo kwibuka Alphonse Rutsindura wabaye umwarimu mu kigo cya Petit Seminaire Virgo Fidelis de Karubanda, aba umusifuzi n'umutoza w'amakipe ya Volleyball atandukanye mu Rwanda ndetse n'ikipe y'igihugu y'abagore, aza kuba na Visi-Perezida wa Federasiyo ya Volleyball (FRVB), mbere yo kwicwa muri Jenoside yakorewe Abatutsi mu 1994.
