Kinyarwanda
English
Kuri uyu wa Gatandatu tariki ya 23 Werurwe 2024, Shampiyona y'Igihugu y'umukino wa Handball yatangiye ikipe ya Police HC yitwara neza.
Yari yerekeje mu Ntara y'Amajyepfo mu Karere ka Ruhango mu ishuri ryisumbuye rya Kigoma (ES Kigoma), aho yakiniye n'ikipe yo muri iri shuri ariyo ES Kigoma hamwe n' ikipe ya Kaminuza y'u Rwanda ishami rya Rukara (UR-Rukara).
Police HC yashoboye gutsinda aya makipe yombi inayarusha cyane kuko umukino wa mbere wayihuje na UR Rukara warangiye iyitsinze ibitego 49 kuri 13, umukino usa nk'uwayoroheye kuko igice cya mbere cyarangiye ifite ibitego 25 byose kuri 6 bya UR Rukara.
Nyuma yaho hakurikiyeho umukino wahuje Police HC na ES-Kigoma.
Iyi kipe ya ES Kigoma ni ikipe isanzwe imenyereye amarushanwa yagerageje kwirwanaho kuko igice cya mbere cy'umukino cyarangiye Police HC iyitsinze ibitego 17 ku 10, umukino wose urangira Police HC iyitsinze ibitego 33 kuri 13 bivuze ko mu minota 30 y'igice cya Kabiri abasore ba ES Kigoma batsinze ibitego bitatu gusa.
Kuri iki cyumweru tariki ya 24 Werurwe, ikipe ya Police HC izerekeza mu Ntara y'Amajyaruguru mu Karere ka Gicumbi aho izakina imikino ibiri irimo uwa Gicumbi HC ikurikizeho uzayihuza na ADEGI-Gituza.
