Kinyarwanda
English
Kuri iki cyumweru tariki ya 15 Ukuboza 2024, Ikipe ya Polisi y’u Rwanda mu mukino wa Handball (Police HC) yatangiye irushanwa rya “ECAHF’’ yitwara neza itsinda Juba City yo mu gihugu cya Sudani y'Epfo ibitego 63 kuri 11.
ECAHF Championship ni irushanwa rihuza amakipe yitwaye neza iwayo mu Karere k’Afurika y’Iburasirazuba, u Rwanda rukaba ari rwo rwakiriye muri uyu mwaka iri rushanwa ku nshuro yaryo ya 42 aho ryitabiriwe n’amakipe yo mu bihugu birimo; u Rwanda, u Burundi, Kenya, Sudani y’Epfo na Uganda.
U Rwanda ruhagarariwe n'amakipe 4 mu bagabo ariyo; Police HC, APR HC, Gicumbi HT na UB Sports n’abiri mu bagore; UOK na ESC.
Mu cyiciro cy’abagabo, harimo amakipe umunani ari yo; APR HC, Police HC na Gicumbi HT na UB Sports zo mu Rwanda, NCPB (Kenya), SOS (Burundi) n’ebyiri zo muri Sudani y’Epfo; Juba City na Cobra.
Mu bagore hazitabira University of Kigali na ESC zo mu Rwanda, Nairobi Water yo muri Kenya na Police yo muri Uganda.
Umukino wa mbere ikipe ya Police HC yacakiranyemo na Juba City wabereye kuri Petit Stade Amahoro i Remera, ari naho iri rushanwa rizakinirwa.
Igice cya mbere cyarangiye Police HC ifite ibitego 38 kuri 4 gusa bya Juba City, umukino wose urangira ku bitego 68 kuri 11 bya Juba City.
Umutoza wa Police HC, CIP(Rtd) Antoine Ntabanganyimama yashimiye abakinnyi uburyo bitwaye mu mukino ufungura iri rushanwa ashimira n’ubuyobozi bwa Polisi y’u Rwanda bukomeje gushyigikira ikipe.
Yagize ati" Ikipe yacu yakoze ibyo yasabwaga gukora nk'ikipe iri mu rugo. N’ubwo irushanwa ari bwo rigitangira, iyi ntsinzi iratanga icyizere. Turashimira ubuyobozi bwa Polisi y'u Rwanda bwatanze ibikenewe byose kugira ngo ikipe yitegure neza iri rushanwa ndetse n'abakunzi ba Police HC bakomeje kuba hafi ikipe. Tuzakora ibishoboka byose kugira ngo tubashyikirize iki gikombe turimo guhatanira."
Irushanwa riheruka ryari ryabereye i Nairobi muri Kenya ryegukanwa na National Cereals and Produce Board (NCPB) yo muri icyo gihugu itsinze ku mukino wa nyuma Gicumbi HT yo mu Rwanda ibitego 34-32.
Icyo gihe Police HC imaze kuryegukana inshuro 3, ikaba ari nayo kipe yo mu Rwanda iheruka gutwara igikombe ubwo ryari ryabereye i Dar es Salaam muri Tanzania mu mwaka wa 2021, yabaye iya gatatu.
Police HC izongera gusubira mu kibuga ku wa Kabiri tariki ya 17 Ukuboza, mu mukino uzayihuza na UB Sports nawo uzabera kuri Petit Stade Amahoro i Remera ku isaha ya saa Kumi n’imwe z’umugoroba.
