POLISI Y'U RWANDA

Ikipe ya Polisi y’u Rwanda mu mukino wa Handball (Police HC) iraranye itike yo kwerekeza mu mikino ya 1/2 cy'irangiza mu irushanwa ry'igikombe cy'intwari

Ni nyuma yo gutsinda ikipe ya TTC Rubengera na Nyakabanda HC, muri iri rushanwa ryatangiye kuri uyu wa Gatandatu tariki ya 10 Gashyantare, ribera mu Mujyi wa Kigali; mu Karere ka Gasabo na Nyarugenge.

Imikino Police HC yakinnye yabereye mu Karere ka Nyarugenge mu kigo cy'urubyiruko cya Kimisagara (Maison des Jeunes).

Ku isaha ya saa tatu nibwo ikipe ya Police HC yari itangiye umukino wayo wa mbere wayihuje n'ikipe ya TTC Rubengera, umukino watangiye ikipe ya Police HC irusha cyane TTC Rubengera, kuko igice cya mbere cyarangiye Police HC ifite ibitego 21 ku busa bwa TTC Rubengera.

Mu gice cya kabiri abasore ba Police HC bakomeje kurusha TTC Rubengera ku buryo bugaragara, umukino uza kurangira Police HC itsinze ibitego 44 kuri 19 bya TTC Rubengera.

Nyuma hakurikiyeho umukino wa Kabiri wayihuje n'ikipe ya Nyakabanda HC, umukino woroheye cyane Police HC kuko igice cya mbere cyarangiye Nyakabanda ishoboye kwinjiza ibitego 4 gusa mu izamu rya Police HC, mu gihe yo yari yinije ibitego 22.

Nyuma y'akaruhuko ikipe ya Police HC yagarutse n'ubundi irusha Nyakabanda HC, umukino wose urangira iyitsinze ibitego 42 kuri 12.

Iyi mikino yombi yahesheje ikipe ya Police HC kugera muri 1/2 cy'irangiza, kizakinwa ku Cyumweru tariki 11 Gashyantare 2024.

Umutoza wa Police HC, CIP (rtd) Antoine Ntabanganyimana yashimiye abakinnyi be, ku ishyaka bagaragaje muri iyi mikino yombi, yizeza abakunzi b'ikipe ko bazakora ibishoboka byose bakegukana iki gikombe cy'intwari.

Yagize ati:  "Ndashimira abakinnyi kuko nta mukino n'umwe basuzuguye, ikipe zose bazifataga nk'izaje mu irushanwa nazo zishaka igikombe. Bazitsinze zose kandi nk'ibisanzwe intego ni ukwegukana iri rushanwa.”

Yakomeje ashimira abakunzi ba Police HC, abakangurira kuzitabira imikino isigaye ari benshi kugira ngo bafatanye ibyishimo, ashimira n'ubuyobozi bwa Polisi y'u Rwanda, uburyo bahora hafi ikipe. 

Amakipe yitabiriye iri rushanwa yari agabanyije mu matsinda 3; aho ikipe ya Police HC yari iri mu itsinda A ihuriyemo na TTC Rubengera na Nyakabanda HC, mu gihe itsinda B ryarimo APR HC, TTC de la Salle na Musanze HC bakiniye i Remera mu Karere ka Gasabo naho itsinda C rikaba ryarimo ADEGI HC, Gorillas HC na ES Kigoma nabo bakiniye ku Kimisagara.