POLISI Y'U RWANDA

Mu marushanwa y’umukino w’intoki ukinirwa ku mucanga (Beach Hand Ball) yabaye mu mpera z’iki cyumweru akabera mu karere ka Rubavu, yarangiye ikipe ya Polisi itwaye icyo gikombe, ikaba iciye agahigo ko gutwara ibikombe 6 byakiniwe mu Rwanda muri uyu mukino wa Hand Ball.

Iri rushanwa ryari ryitabiriwe n’amakipe 6 ariyo Police HBC, ikipe y’Ishuri Rikuru ry’Imari n’Amabanki (SFB), Ishuri ryisumbuye rya Kigoma (ESEKI), Stella HBC yo mu mujyi wa Rubavu, Vision Jeunesse Nouvelle nayo yo mu mujyi wa Rubavu n’ikipe y’icyahoze ari Ishuri Rikuru Nderabarezi rya Kigali(KIE).

Rugikubita, amakipe yashyizwe mu matsinda abiri, Police HBC ikaba yaragiye mu itsinda ririmo Stella HBC na SFB.

Irindi tsinda rikaba ryari ririmo Vision Jeunesse Nouvelle, Ishuri ryisumbuye rya Kigoma (ESEKI), n’Ishuri Rikuru Nderabarezi rya Kigali (KIE).

Mu majonjora, Police HBC yatsinze imikino yayo yose, izamukana n’andi makipe 3 ariyo Ishuri Rikuru ry’Imari n’Amabanki (SFB), Stella HBC, n’Ishuri Rikuru Nderabarezi rya Kigali(KIE).

Muri ½, Police HBC yatsinze Ishuri Rikuru ry’Imari n’Amabanki naho Stella HBC itsinda  Ishuri Rikuru Nderabarezi rya Kigali(KIE).

Bityo, umukino wa nyuma waje guhurirwaho na Police HBC na Stella HBC, Police HBC ihita inayitsinda, itwara igikombe cya Beach Hand Ball idatsinzwe umukino n’umwe.

Iki kikaba ari igikombe cya 6 Polisi Handball Club itwaye mu mwaka umwe gusa, nyuma yo gutwara igikombe icya Shampiyona, icyo kwizihiza umunsi w’umurimo, icy’umunsi wo kwibohora, ahariwe umunsi kwibuka jenoside yakorewe abatutsi, n’icya carré d’As.

Nyuma y’umukino, umutoza wa Police HBC Assistant Inspector of Police (AIP) Antoine Ntabanganyimana yavuze ko bashimishijwe no gutwara iki gikombe aho yagize ati:”Dushimishijwe no gutwara iki gikombe, kuko biratuma twitegura neza igikombe gihuza amakipe yabaye aya mbere iwayo mu bihugu bya Afurika y’Iburasirazuba n’iyo hagati”.

Biteganyijwe ko niba nta gihindutse iki gikombe kizabera mu gihugu cya Kenya, kikazatangira ku itariki ya 5 Ukuboza uyu mwaka wa 2014.

Ibihugu biteganyijwe kuzaryitabira ni:Uganda, Tanzaniya, Repubulika Iharanira Demokarasi ya Congo, Etiyopiya, Rwanda, Burundi, Zanzibar na Kenya.