POLISI Y'U RWANDA

Police Handball Club yatsinze  Gicumbi Handball Club ibitego 34 kuri 23 ku munsi wa gatanu wa shampiyona y’umukino w’intoki (Handball) yakomeje ku cyumweru tariki 26 Mata 2015.

Uyu mukino wahuje aya makipe yombi  wabereye ku kibuga cya Handball kiri muri Ishuri rikuru ry’uburezi rya Kaminuza y’u Rwanda  (College of Education-UR).

Police Handball Club yatsinze imikino yose itanu imaze gukina y’iyi shampiyona . Ibi biyishyira ku mwanya wa mbere  n’amanota 15/15, ikaba ikurikiwe na APR Handball Club ifite amanota 13/15.

Police Handball Club imaze gutsinda ibitego 166 muri iyo mikino itanu, ikaba imaze kuyitsindirwamo ibitego 93, bikaba bisobanuye ko izigamye ibitego 73.

Muri iyo mikino itanu , APR Handball Club iyikukiye , imaze gutsinda ibitego 129, ikaba imaze gutsindwa ibitego 102. Ibi bisobanura ko izigamye ibitego 27.

Ni ukuvuga ko Police Handball Club irusha APR Handball Club ibitego bibiri muri iyo mikino itanu imaze gukinwa, n’ibitego 46 iyirusha mu byo izigamye.  

Ibitego 34 bya Police Handball Club yatsinze Gicumbi Handball Club birimo 8 byatsinzwe na Mutuyimana Gilbert na 7 byatsinzwe na Duteteriwacu  Nolbert.

Umutoza wa Police Handball Club,  Assistant Inspector of Police (AIP) Antoine Ntabanganyimana, yavuze ko iyi ntsinzi, kimwe n’izindi nyinshi zayibanjirije, bayikesha ubuyobozi bwiza bw’iyi kipe, buba hafi y’abakinnyi mu kubaha ibyo bakeneye, ndetse n’inama.

Yavuze kandi ko bayikesha imyitozo myinshi, ubushobozi n’ubushake by’abakinyi, bakina bafite intego yo gutsinda.

AIP Ntabanganyimana yavuze ko bari gutegura neza umukino uzabahuza ku itariki 2 Gicurasi, 2015 n’ishuri ryisumbuye ryo mu  karere ka Karongi ryitwa Urumuri Secondary School.

Yavuze kandi ko bari gutegura amarushanwa yo kwizihiza umunsi mukuru w’umurimo uzaba ku itariki 9 Gicurasi,uyu mwaka.

Police Handball Club yatsinze amarushanwa abiri amaze gukinwa muri uyu mwaka ari yo: Impano n’Impamba Handball Trophy, n’ay’umunsi mukuru wo kwibuka Intwari z’u Rwanda (Heroes’ Day Tournament).

Police Handball Club yatwaye kandi ibikombe byose uko ari 8 by’amarushanwa yakinwe mu mwaka ushize.

Yagize ati,"Intego yacu n’ugutwara ibikombe by’amarushanwa azakimwa no muri uyu mwaka kandi twarabitangiye, kuko tumaze gutwara ibikombe by’amarushanwa amaze, tumaze no gutsinda imikino yose itanu imaze gukinwa muri iyi shampiyona ikomeje.Gutsina twabigize intego."

Yasabye abakinyi gukomeza kurangwa n’umurava baharanira gukomeza gutwara intsinzi.