Kinyarwanda
English
Ikipe y’umukino w’intoki ya Police Handball Club yegukanye ibikombe bya Shampiyona bine bikuriranye yashimangiye ubudahangarwa bwayo itsinda Ikipe y’Urwunge rw’amashuri rwa Rambura ku wa gatatu tariki 20 Nyakanga, iyi ntsinzi ikaba yaratumye isubira ku mwanya wa mbere muri iyi Shampiyona.
Police Handball Club yatsinze iyi Kipe ibitego 44 kuri 17. Iyi ntsinzi yo ku munsi wa 13 wa Shampiyona yatumye yisubiza umwanya wa mbere, ikaba ifite amanota 39.
Muri uwo mukino wabereye i Rambura mu karere ka Nyabihu, Muhawenayo Jean Paul yawutsinzemo ibitego 15 naho Mutuyimana Gilbert yawutsinzemo 14.
Police Handball Club ni yo ifite ibikombe by’amarushanwa y’Umunsi Mukuru wo kwibohora no Kwibuka Jenoside yakorewe Abatutsi mu 1994, ikaba isigaje gukina imikino itanu muri iyi Shampiyona.
Isigaje gukina n’Ishuri ryisumbuye ry’Urumuri, Kaminuza y’u Rwanda – Ishami ry’Uburezi n’Ishami rya Huye, College Inyeramihigo na APR irusha amanota abiri.
Umutoza wa Police Handball Club, Assistant Inspector of Police (AIP) Antoine Ntabanganyimana yashimye abakinnyi kubera gukina bafite intego yo gutsinda.
Yagize ati:"Imikino itanu dusigaje gukina tugomba kuyitegura neza kugira ngo na yo tuzayitsinde. Biradusaba gukora imyitozo ihagije."
