POLISI Y'U RWANDA

Ikipe y’umupira w’amaguru ya Polisi y’u Rwanda (Police Football Club) ku itariki 27 Nyakanga  2015 yeretse itangazamakuru abakinnyi  14 iheruka kugura.

Umuyobozi mukuru wa Polisi y’u Rwanda, IGP Emmanuel K. Gasana ni we wari umushyitsi mukuru muri  uwo muhango wabereye ku kibuga cy’umupira w’amaguru kiri murenge wa Niboyi, mu karere ka Kicukiro.

Uwo muhango witabiriwe kandi n’Umuyobozi mukuru wa Polisi y’u Rwanda wungirije ushinzwe ubutegetsi n'abakozi , DIGP Jévenal Marizamunda n’abandi bofisiye bakuru ba Polisi y’u Rwanda ndetse n’abafana ba Police FC .

Abakinnyi baguzwe ni: Mushimiyimana Muhamed wavuye mu gihugu cya Hongiriya, Neza Anderson wavuye mu gihugu cya Esipanye, Ndatimana Robert na Muganza Isaac bavuye muri Rayon Sports,Turatsinze Héritier na Ngomirakiza Hegman bakiniraga APR FC,Usengimana Danny na Tuyisenge Hakim bari muri Isonga FC.

Abo bakinnyi barimo kandi Muvandimwe Jean Marie Vianney na Bwanakweri Emmanuel bavuye muri Gicumbi FC, Hakizimana Irambona Japhet n’Uwihoreye Jean Paul bavuye muri Musanze FC , na Songa Isaie ndetse  n’Umwungeri  Patrick bakiniraga AS Kigali.

Uretse bariya 14 Police FC yaguze,  yasezereye kandi abakinnyi icumi.

IGP Gasana yabwiye abo bakinnyi ati:"Muri 'Inkomezamihigo', bivuze gukomeza gutsinda. Ntitugomba gusubira inyuma. Instinzi tugomba kuyihorana ibihe byose".

Yakomeje agira ati:"Polisi FC n’isura ya Polisi y’u Rwanda ikaba n’isura y’umuryango mugari nyarwanda Abanyarwanda bibonamo".

Yongeyeho agira kandi ati:"Ubushize twesheje umuhigo dutwara igikombe cy’amahoro.Gukomeza imihigo rero bivuga gukomeza gutwara ibikombe haba mu gihugu ndetse no hanze yacyo, ibyo bikaba bizatuma dukomeza kwerekana isura nziza ya Polisi y’u Rwanda n’iyigihugu muri rusange ".

Asobanura umumaro w’imikino,IGP Gasana yagize ati:"Imikino ituma  abantu bahura bakidagadura kandi bagasabana, maze kandi binyuze muri uko gushyikirana bagafatira hamwe ingamba zo kurushaho  gusigasira umutekano kandi buri wese abigizemo uruhare".

Yabasezeranyije ko ubuyobozi bwa Polisi y’u Rwanda buzakomeza gutera iyi kipe inkunga irimo ibikoresho, kugira  inama abakinnyi bayo no kubongerera ubumenyi kugira ngo ikomeze gutsinda no gutwara ibikombe.

IGP Gasana yavuze ko Polisi y’u Rwanda iteganya kubaka aho abakinnyi ba Police FC bazajya baba.

Umwe muri abo bakinnyi witwa Mushimiyimana yagize ati:"Mu bintu byatumye mpitamo gukinira Police FC harimo ko ari ikipe ifite ubuyobozi bwiza, abatoza beza ndetse n’abakinnyi b’abahanga. Ikindi kandi n’uko nasanze ari ikipe ishobora kumfasha gukomeza guteza imbere imikinire yanjye ".

Yasezeranyije ubuyobozi bwa Polisi y’u Rwanda ko azafatanya na bagenzi be gukomeza gutwara ibikombe nk’uko biri mu ntego za Polisi y’u Rwanda.

Police FC niyo izahagararira u Rwanda muri  shampiyona y’Umupira w’amaguru ku mugabane wa Afurika izaba muri Gashyantare umwaka utaha naho Shampiyona yo  mu Rwanda ikaba izaba muri Nzeri uyu mwaka.