Kinyarwanda
English
Kuri iki cyumweru tariki ya 24 Mata, kuri stade y'akarere ka Bugesera, Police Athletic Club yatwaye Igikombe cya Shampiona yo gusiganwa ku maguru ihigitse APR Athletic Club yabaye iya kabiri na Sina Gerard-Nyirangarama yabaye iya gatatu.
Iki gikombe icyegukanye nyuma yo gutwara imidari 19 irimo umunani ya Zahabu, itandatu ya Feza, n'itanu y'Umuringa, mu byiciro by'abahungu n'abakobwa.
PC Abayisenga Elyse; Kapiteni w'ikipe ya Police Athletic Club yavuze ko iki gikombe bagikesha imyitozo no kwitabwaho mu buryo bwose, batabura gushimira Ubuyobozi bwa Polisi y'u Rwanda.
Yagize ati: "Imidari myinshi yatugejeje ku gikombe tuyikesha imyitozo twakoze, cyane ko tunitegura amarushanwa akomeye arimo Kigali Peace Marathon iteganyijwe kuzaba mu kwezi kwa gatanu na EAPCO izaba mu kwezi kwa munani kandi naho twitoza dushaka kuzatwara igikombe."
Yakomeje agira ati:" ibi byose tubikesha ubuyobozi bwiza bwa Polisi y'u Rwanda butwitaho mu byuryo bwose, rero ntampamvu yo kudatwara Ibikombe kandi n'ibindi dufite icyizere cy'uko tuzabitwara."
Inspector of Police (IP) Audace Gasagara umutoza wa Police Athletic Club yavuze ko intsinzi y'uyu munsi bayikesha imyitozo yo ku rwego mpuza mahanga, kuko abakinnyi babateguye bagamije kugira ngo bazabashe gutsinda amarushanwa mpuzamahanga rero bitari kubagora gutwara Igikombe cy'uyu munsi.
Ibi kandi byashimangiwe n'umuyobozi w'Ishyirahamwe ry'umukino wo gusiganwa ku maguru Lt. Col (Rtd) Kayumba Lemuel wavuze ko iyi shampiyona yateguwe hagamijwe kuzamura urwego rw'abakinnyi bazatoranywamo abaserukira ikipe y?igihugu izitabira amarushanwa mpuzamahanga.
Yagize ati: "Iri rushanwa turitegura tugamije kuzamura ubushobozi bw'abakinnyi cyane ko twitegura amarushanwa akomeye arimo n'amarushanwa mpuzamahanga, bikadufasha gutoranya abakinnyi tuzifashisha mu ikipe y'igihugu. Ikipe ya polisi nayo rero tuzakuramo benshi mu bo tuzifashisha cyane ko yo imenyereye gukina amarushanwa mpuzamahanga."
