POLISI Y'U RWANDA

Urubyiruko rwo mu kagari ka Rwampara, mu murenge wa  Nyarugenge, akarere ka Nyarugenge , mu cyumweru gishize rwakoze igitaramo cyo gukangurira bagenzi babo kwirinda kwishora mu biyobyabwenge.

Iki gikorwa cy’ubukangurambaga cyateguwe n’Inama y’Igihugu y’Urubyiruko ku rwego rw’akarere ka Nyarugenge ifatanyije n’Urubyiruko rw’Abakorerabushake mu gukumira ibyaha bo mu murenge wa Nyarugenge bazwi mu rurimi rw’Icyongereza nka Rwandan Youth Volunteers in Community Policing (RYVCP).

Iki gitaramo cyitabiriwe n’urubyiruko rugera kuri 200. Cyabereye ku Biro by’Akagari ka Rwampara ku wa 23 Ukuboza uyu mwaka guhera saa cyenda kugeza saa kumi n’imwe z’umugoroba.

Uru rubyiruko rwatanze ubutumwa ku kwirinda ibiyobyabwenge biciye mu ndirimbo, ikinamico, imikino, n’ibindi bihangano bitandukanye.

Iyi ibaye inshuro ya kabiri urubyiruko rwo mu murenge wa Nyarugenge rukoze igitaramo cyo gukangurira Umuryango nyarwanda kwirinda kwishora mu biyobyabwenge. Ku nshuro ya mbere byakozwe n’urwo mu kagari ka Gatare; byabaye muri uku kwezi. Urubyiruko rwo muri uyu murenge rukaba rufite intego yo gukora ibitaramo nk’ibi mu tugari twose tuwugize.

Mu ijambo yagejeje ku rubyiruko rwitabiriye igitaramo cyabereye muri Rwampara, Umunyamabanga Nshingwabikorwa w’Umurenge wa Nyarugenge, Havuguziga Charles yabanje gushimira abateguye icyo gitaramo agira ati,"Iyi ni intambwe ikomeye mu gufatanya kurwanya ukwishora mu biyobyabwenge. Igishimishije kurushaho ni uko iki gikorwa cyakozwe n’urubyiruko. Buri wese akwiriye kumva ko kurwanya ukwishora mu biyobyabwenge bimureba. Nta wugomba kwigira ntibindeba."

Yagize kandi ati,"Hari bamwe muri bagenzi banyu batwara inda bitewe no kunywa ibiyobyabwenge; ku buryo bibaviramo kwandura zimwe mu ndwara zandurira mu mibonano mpuza bitsina, kureka ishuri, n’izindi ngaruka zitandukanye. Murasabwa kwirinda ibiyobyabwenge aho biva bikagera niba mushaka ahazaza heza."

Ushinzwe imikoranire ya Polisi n’abaturage ndetse n’izindi nzego mu karere ka Nyarugenge, Inspector of Police (IP) Jean Bosco Segatare yabwiye urwo rubyiruko ko ibiyobyabwenge bitera ababinywa gukora ibyaha birimo gukubita no gukomeretsa, gufata ku ngufu n’ubujura; hanyuma abasaba kubyirinda no gutungira agatoki Polisi ababyishoramo.

Yagize ati,"Nk’uko byitwa; ibiyobyabwenge biyobya ubwenge bw’uwabinyoye. Ni yo mpamvu akora ibyaha kubera ko nta mutimanama aba afite. Muri make; ni byo bimukoresha. Mubyirinde, kandi mukangurire abandi kubyirinda."

IP Segatare yasabye urwo rubyiruko gutangira ku gihe amakuru yerekeye abinjiza ibiyobyabwenge mu gihugu, ababicuruza n’ababikoresha.