Kinyarwanda
English
Kuwa 08 Kamena 2018, anteni y’ikigo cy’itumanaho cya MTN, iri hejuru y’inyubako ya Ndamage mu mujyi wa Kigali rwagati, ahazwi nko kwa Ndamage mu karere ka Nyarugenge, Umurenge wa Nyarugenge, akagali ka Kiyovu umudugudu wa Nyarurembo, yafashwe n’umuriro w’amashanyarazi ku gihe cya saa tatu n’iminota mirongo ine z’ijoro (21h40’) z’ijoro. Polisi y’u Rwanda ishami rishinzwe gutabara no kurwanya inkongi z’umuriro ryatabaye mu gihe gito ribasha kuzimya uwo muriro.
Umuyobozi w’ishami rishinzwe ubutabazi no kurwanya inkongi z’umuriro (Fire & Rescue Brigade), Assistant Commissioner of Police (ACP) Jean Baptiste Seminega yavuze ko bahawe amakuru n’abaturage babibonye igifatwa, ari byo byatumye babasha kuhagera itarabasha gukongeza ahandi.
ACP Jean Baptiste Seminega yagize ati:’’Twahawe amakuru n’abaturage, bakoresheje itumanaho ku murongo utishyurwa wa 122, batubwira ko Anteni ya Sosiyete y’itumanaho ya MTN iri ku nyubako yo kwa Ndamage yafashwe n’inkongi y’umuriro w’amashanyarazi. Twahise twihutira kugerayo, twitwaje ibikoresho byabugenewe twifashisha mu kuzimya umuriro tubasha kuyizimya mu gihe kingana n’iminota icumi (10 min), itarabasha gukongeza inyubako iriho ndetse n’izindi bibangikanye. Haracyakorwa iperereza ngo hamenyekane icyaba cyarateye iriya nkongi y’umuriro.’’
ACP Seminega yashimiye abaturage batanze amakuru, anasaba abaturarwanda muri rusange kujya bihutira kubimenyekanisha igihe cyose babonye hari ahafashwe n’inkongi.
Aha yagize ati:’’Mbere na mbere turashimira abatanze amakuru y’iyi nkongi. Inkongi z’umuriro w’amashanyarazi ni impanuka ikurura akaga gakomeye haba ku nyubako, ibikoresho ndetse no ku buzima bw’abantu. Igihe rero hatabonetse ubutabazi bwihuse, niko umuriro ugenda ukaza ingufu mu gutwika no kwangiza aho ugeze, niyo mpamvu dusaba ko abantu bajya bahita batumenyesha hakiri kare.’’
CIP Seminega, yakomeje agira inama abaturage kwitwararika mu gukoresha ibyuma bikoresha amashanyarazi no kugenzura niba insinga zikoreshwa mu kujyana umuriro w’amashanyarazi zujuje ubuziranenge.
Yagize ati:’’Turasaba abantu kujya bitwararika, igihe bakoresha ibikoresho by’amashanyarazi, birimo ibyifashishwa mu guteka, gutera ipasi n’ibindi, kuko bijya bigaragara ko biba inkuruzi yo gutera inkongi y’umuriro. Tuributsa kandi abafite amazu, amamodoka n’ibindi bishobora gufatwa n’inkongi y’umuriro bigakongoka ndetse n’ababirimo bakaba baburiramo ubuzima, guteganya icyuma cy’ibanze kizimya umuriro bityo bakaba bagikoresha mu gihe habayeho impanuka itewe n’umuriro. Ikindi twabasaba ni ukujya babanza kureba niba insinga z’umuriro bagiye gukoresha mu gukurura umuriro zujuje ubuziranenge’’
ACP seminega yasoje amenyesha uwaba ahuye n’inkongi y’umuriro wese kubimenyesha Polisi ku mirongo itishyurwa ikurikira ariyo; 122, 0788311224 cyangwa 11120.
