POLISI Y'U RWANDA

Ejo tariki ya 7 Gashyantare, abanyeshuri biga mu kigo cy’ amashuri yisumbuye cya Lycée de Kigali, basuwe na Police, aha aba banyeshuri bakaba barahawe ubutumwa bwo kubashishikariza kurwanya no gukumira ibiyobyabwenge ndetse n’ ihohoterwa rishingiye ku gitsina.

Umuyobozi wa Polisi, ushinzwe ishami rirwanya ihohoterwa rishingiye ku gitsina ariwe, Senior superintendent, Rose Muhisoni yasobanuriye abo banyeshuri ko ihohoterwa rigira amoko menshi nka, nk’irishingiye ku mutungo, irikorerwa umubiri (gukubita no gukomeretsa), irikomeretsa umutima ndetse n’ irishingiye ki gitsina.

Muhisoni yasabye abanyeshuri cyane ab’ igitsina gore kwirinda umuntu uwariwe wese wabashukisha impano zaba into cyangwa inini agamije kubashora mu busambanyi.

Yagize ati, “ Ihohoterwa rigira ingaruka mbi kandi nyinshi zirimo, nko kwandura indwara zidakira nka Sida, gutwara inda zidategenyijwe, kuva mu ishuri n’ izindi nyinshi.” Yakomeje abasaba kwirinda ikintu icyo aricyo cyose cyabarangaza, anabasaba ko bakwita ku masomo bityo kugirango bazavemo, abanyarwanda bafite ubumenyi butandukanye ndetse buzanafasha guteza imbere igihugu cyabo.

SSP Muhisoni yasabye kandi abo banyeshuri guhamagara imirongo ya telefoni ya Polisi itishyurwa ya 3512 na 116, igihe bafite amakuru kubijyanye n’ ihohoterwa.

Superintendent Jeanvier Ntakirutimana, umuyobozi w’ agashami gashinzwe kurwanya ibiyobyabwenge, we yavuze ko ibiyobyabwenge ari ikibazo kibangamira umutekano ndetse gishobara no kubangamira imitsindire y’ umunyeshuri bityo bikaba byanamuviramo no kutagera ku ntumbero yihaye.

Gafaranga Mselem Aisha, n’ umunyeshuri by’ umwihariko akaba ari umuyobozi w’ abakobwa yashimiye Polisi y’u Rwanda inyigisho yabahaye, kuriwe akaba abona ko izo nyigisho zigamije kubaha icyerekezo cyiza ndetse no kubafasha kuzavamo abaturarwanda babereye igihugu n’ iterambere ryacyo.

Uyu munyeshuri yasabye bagenzi be cyane abakobwa gutera intambwe ya gitwari barwanya ihohoterwa ndetse bagaharanira buri gihe kuba intangarugero bakora ibyo ababyeyi ndetse n’ igihugu kibategerejeho.

Umuyobozi w’ ikigo, Bwana Masabo M. Martin, yashimiye Polisi y’u Rwanda kuba idahwema kuza kuganiriza abanyeshuri kwirinda ibiyobyabwenge ndetse n’ ihohoterwa.

Yavuze ko ubufatanye bwa Polisi n’ ikigo, bwatumye abanyeshuri bakomeza gusobanukirwa n’ ububi bw’ ibiyobyabwenge, ndetse ibi bikaba byaratumye bamwe mu bari bafite iyo ngeso bayicikaho.

Umuyobozi w’ ikigo yavuze kandi ko urugamba rwo kurwanya no gukumira ibiyobyabwenge ndetse n’ ihohoterwa bitakagombye guharirwa Polisi yonyine, ahubwo abanyarwanda muri rusange bakwiriye kumva ko bibareba bityo bagahagurukira kubirwanya bahanahana amakuru n’ inzego z’ umutekano.

Uyu muhango wasojwe n’ umukino w’ umupira w’ amaguru wahuje ikipe y’ abapolisi ndetse n’ ikipe y’ abarimu kuri icyo kigo, uyu mukino ukaba wararangiye ikipe y’ abapolisi itsinze ibitego 3 kuri 1 ky’ ikipe y’ abarimu.