Abarezi n’abanyeshuri barererwa mu rwunge rw’amashuri rwa Nyanza mu murenge wa Cyabakamyi mu karere ka Nyanza basaga 450 mumpera z’icyumweru dusoje baganirijwe na Polisi kuruhare bafite mu gukumira ibyaha birimo ibiyobyabwenge kuko bidindiza ireme ry’uburezi bikanahungabanya umutekano.

Ni ibiganiro byatanzwe na Assistant Inspector of Police (AIP) Joseph Tuyambaze ushinzwe guhuza ibikorwa bya Polisi n’abaturage hagamijwe gukumira ibyaha muri aka Karere ari kumwe na Nsanzamahoro Epimaque umuyobozi wiri shuri.

AIP Tuyambaze yagaragarije abanyeshuri ko ibiyobyabwenge byangiza ubikoresha bikanahungabanya umutekano.

Yagize ati “Ibiyobyabwenge nkuko byitwa biyobya ubwenge bw’uwabikoresheje, umunyeshuri wabyishoyemo bimuviramo ingaruka zo guta ishuri akishora mu ngeso mbi ejo heza igihugu cyari kimwitezeho hakangirika.’’

AIP Tuyambaze akomeza asaba aba banyeshuri ubufatanye mu kubirwanya batanga amakuru kubabicuruza.

Yagize ati “Nimwe bayobozi b’ejo hazaza, ntibyagerwaho hari bagenzi banyu bataye ishuri kuko babaswe n’ibiyobyabwenge, mukwiye gufasha inzego z’ubuyobozi    kubirwanya mutanga amakuru yaho bicururizwa.”

AIP Tuyambaze yibukije aba banyeshuri ko bakwiye kuba intangarugero mu midugudu batuyemo bagira uruhare mu gukumira ibyaha birimo amakimbirane mu miryango,ihohoterwa rikorerwa abana kuko byose bigira ingaruka kuburenganzira bw’abana n’umutekano muri rusange.

AIP Tuyambaze yasoje asaba aba banyeshuri kwirinda ababashuka bababwirako bababoneye akazi n’amashuri meza hanze y’Igihugu.

Yagize ati “Isi y’ugarijwe n’icyibazo cy’icuruzwa ry’abantu aho hari abashuka abana bakabajyana babijeje akazi n’amashuri meza kandi bo bagambiriye kubakoresha ibikorwa by’urukozasoni n’ubucakara. Igihe hari ubikubwiye ukwiye kugira amakenga ukihutira kumenyesha inzego z’umutekano.’’

Nsanzamahoro Epimaque umuyobozi  w’ishuri yashimiye Polisi y’u Rwanda kuba yafashe umwanya ikaza gutanga ikiganiro kubanyeshuri abereye  Umuyobozi asaba abanyeshuri gutanga amakuru yaho ibiyobyabwenge bigaragara kuko bikomeje kwangiza urubyiruko kandi arirwo ruzavamo abayobozi b’ejo hazaza.