Polisi ikorera mu karere ka Nyagatare yafashe moto ebyiri  zari zipakiweho amakarito 37 y’inzoga z’itemewe zo mu bwogo bwa zebra waragi.

Izi moto zafatiwe mu murenge wa Karangazi mu kagari ka Mbare kuri uyu wa 01 Ugushyingo2018, zipakiye inzoga zitemewe zo mu bwoko bwa Zebra waragi hafatwa Dusabe Jean de Dieu mu gihe mugenzi we yahise ata moto agacika.

Umuvugizi wa Polisi mu Ntara y’Iburasirazuba Chief Inspector of Police (CIP)Theobald Kanamugire yavuze ko abaturage batanze amakuru ko hari moto zishobora kuba zipakiye magendu bituma abapolisi bazitegera mu muhanda zanyuragamo.

Yagize ati “Abaturage nibo baduhaye amakuru bagize amakenga ya moto zasaga n’izipakiye ibicuruzwa bagira ngo ni magendu. Nibwo abapolisi bazitegeye mu muhanda zibagezeho basanga zipakiye inzoga z’ibiyobyabwenge zo mu  bwoko bwa zebra.”

CIP Kanamugire akomeza asaba abaturage kurushaho kuba maso bakarwanya abakomeje kwinjiza ibiyobyabwenge n’inzoga zitemewe  mu  gihugu.

Yagize ati “Agace dutuyemo gafatwa nk’inzira y’injiza ibiyobyabwenge cyangwa inzoga zitemewe mu gihugu bituruka mu bihugu by’abaturanyi uruhare rwa buri wese rurakenewe mu kurwanya ibiyobyabwenge atangira amakuru kugihe.’’

CIP kanamugire y’ibukije abaturage ko ibiyobyabwenge n’inzoga z’inkorano biri ku isonga ry’ibitera umutekano muke.

Yagize ati “ Ibiyobyabwenge n’inzoga z’inkorano biri ku isonga  mubihungabanya umutekano kuko bitera ubikoresha kwishora mu byaha bitandukanye birimo urugomo, amakimbirane yo mungo inzego zitandukanye zikaba zarahagurukiye kubirwanya hagamije kubungabunga umutekano no kurengera ubuzima bw’abaturage.’’

asoza avuga ko ingamba zo kurwanya ibiyobyabwenge za kajijwe ubicuruza ntamahirwe  afite

Amabwiriza agenga ubuziranenge bw’ ibinyobwa mu ngingo yayo ya 24 ateganya ko ikinyobwa kirengeje volte 45 za arukoro ndetse n’ibindi binyobwa bitujuje ubuziranenge bifatwa nk’ibiyobyabwenge.